மக்களவைக்கு வராத அமைச்சர்கள்: மன்னிப்புக் கேட்டது மத்திய அரசு

சம்பந்தப்பட்ட துறை அமைச்சர்கள் வராத காரணத்தால்,
மக்களவையில் கேள்விநேரத்தின்போது எதிர்க்கட்சியினர்
கூச்சலிட்டதை தொடர்ந்து, மத்திய அரசு மன்னிப்புக்
கேட்டது.

உறுப்பினர்கள் எழுப்பிய கேள்விக்கு பதிலளிக்க சம்பந்தப்
பட்ட ரயில்வே துறை அமைச்சர் மக்களவைக்கு வராத
காரணத்தால் எதிர்க்கட்சியினர் தொடர்ந்து கூச்சலிட்டனர்.
அதையடுத்து, மத்திய அரசு சார்பில் நாடாளுமன்ற
விவகாரங்கள் துறை அமைச்சர் வெங்கய்ய நாயுடு
மன்னிப்பு கேட்டார்.

மக்களவை அதன் தலைவர் சுமித்ரா மகாஜன்
தலைமையில் புதன்கிழமை கூடியது. கேள்வி நேரம்
தொடங்கிய உடன், ரயில்வே துறை சம்பந்தப்பட்ட
"முன்னேறு இந்தியா-ஸ்மார்ட் கார்டு' திட்டம் குறித்து
எதிர்க்கட்சியினர் கேள்வி எழுப்பினர்.

அப்போது, மக்களவைத் தலைவர் சுமித்ரா மகாஜன்
இந்த விஷயம் விவாதத்துக்கு எடுத்துக் கொள்ளப்படுவதாக
தெரிவித்தார்.

ஆனால், கேள்விக்கு பதிலளிக்க ரயில்வே துறை அமைச்சர்
சுரேஷ் பிரபுவும், அதன் இணை அமைச்சர் மனோஜ்
சின்ஹாவும் மக்களவையில் இல்லை.

அதைத் தொடர்ந்து, அவர்கள் வராததற்கு காங்கிரஸ்
உறுப்பினர்கள் கடும் கண்டனம் தெரிவித்து கூச்சலிட்டனர்.

அப்போது, காங்கிரஸ் மூத்த தலைவர் மல்லிகார்ஜுன கார்கே,
"ஒரு துறை சம்பந்தப்பட்ட கேள்வி அவையில் எழுப்பப்படும்
போது, அத்துறை அமைச்சர் விளக்கம் அளிக்க வேண்டும்.
ஆனால், அவர் அவைக்கு வரவில்லை. இதன்மூலம்
நாடாளுமன்ற விதிகளை அவர் பின்பற்றவில்லை' என்றார்.

அதையடுத்து, அமைச்சர் சுரேஷ் பிரபு வேறொரு பணி
காரணமாக மக்களவைக்கு வரவில்லை என்று எனக்கு தகவல்
தெரிவிக்கப்பட்டது என்றார் சுமித்ரா மகாஜன்.

அதைத் தொடர்ந்து பேசிய மல்லிகார்ஜுன கார்கே,
"அமைச்சர்கள் அவைக்கு வராமல் இருப்பது இது முதல்முறை
அல்ல. ஏற்கெனவே இதுபோன்று நடந்திருக்கிறது. நாங்கள்
மட்டும் விதிமுறைகளை பின்பற்ற வேண்டுமா? என்று
கேள்வி எழுப்பினார்.

அப்போது, குறிக்கிட்டுப் பேசிய வெங்கய்ய நாயுடு,
"இது தவறு தான். இதுபோன்று இனி நடக்காது. சம்பந்தப்பட்ட
துறை அமைச்சர்கள் வராததற்கு மத்திய அரசின் சார்பில்
மன்னிப்பு கேட்டுக் கொள்கிறேன்' என்றார்.
-
-----------------------------
தினமணி