முதலமை‌ச்சர் கருணாநிதிக்கு தேர்தல் பயம

முதலமை‌ச்சர் கருணாநிதிக்கு தேர்தல் பயம் வந்துவிட்டதாக அ.இ.அ.தி.மு.க பொதுச்செயலர் ஜெயலலிதா தெரிவித்துள்ளார்.

இது தொடர்பாக அவர் இன்று வெளியிட்டுள்ள அறிக்கை‌யி‌ல், ''முதலமை‌ச்சர் கருணாநிதி தேர்தல் பயத்தில் இருக்கிறார் என்பதை அவருடைய சமீபத்திய நடவடிக்கைகள் தெளிவாக உணர்த்துகின்றன. 27.5.2010 அன்று நடைபெற்ற அ.இ.அ.தி.மு.க செயற்குழுக் கூட்டத்தில், “அடுத்த ஆண்டில் மே மாதம் 27 ஆம் தேதி வருவதற்குள் தமிழக பொதுத் தேர்தல் நடந்து முடிந்து, ஆட்சி மாற்றம் ஏற்பட்டு, புனித ஜார்ஜ் கோட்டையில் அ.இ.அ.தி.மு.க ஆட்சியில் அமர்ந்திருக்கும்” என்று நான் தெரிவித்து இருந்தேன்.

நான் இவ்வாறு தெரிவித்த உடன், புனித ஜார்ஜ் கோட்டையில் உள்ள தமிழக சட்டப் பேரவை மண்டபத்தில் உள்ள இருக்கைகளை உடனடியாக அகற்றியுள்ளார் முதலமை‌ச்ச‌ர். இதோடு மட்டுமல்லாமல், செம்மொழி மத்திய ஆய்வு நிறுவனத்தின் நூலகத்திற்கு புனித ஜார்ஜ் கோட்டையில் உள்ள தமிழக சட்டப் பேரவை மண்டபத்தை ஒதுக்கித் தருமாறு அந்நிறுவனத்தின் பொறுப்பு அலுவலரிடமிருந்து ஒரு கடிதத்தைப் பெற்றிருக்கிறார். இந்தக் கடிதத்தின் மீது உடனடியாக நடவடிக்கை எடுக்குமாறு தமிழ் வளர்ச்சி அறநிலையங்கள் மற்றும் செய்தித் துறைக்கும் உத்தரவிட்டிருக்கிறார்.

இந்தத் துறையும் உடனடியாக அன்றே இதற்கான கோப்பை சட்டப் பேரவைச் செயலகத்திற்கு அனுப்பி வைத்திருக்கிறது. இதனையடுத்து, புனித ஜார்ஜ் கோட்டையில் உள்ள தமிழக சட்டப் பேரவை மண்டபத்தை தமிழ் வளர்ச்சி, அறநிலையங்கள் மற்றும் செய்தித் துறைக்கு ஒப்படைப்பு செய்து சட்டப் பேரவைச் செயலகமும் 2.6.2010 அன்று ஆணை பிறப்பித்து இருக்கிறது. இந்த நடவடிக்கையில் இருந்தே அவருக்கு தேர்தல் ஜூரம் எந்த அளவுக்கு இருக்கிறது என்பதை எளிதில் புரிந்து கொள்ளலாம்.

இது மட்டும் அல்லாமல் தற்போது தமிழகத்தில் நிலவும் சட்டம்-ஒழுங்கு சீரழிவு, கடுமையான மின்வெட்டு, விலைவாசி உயர்வு, தொழில் மந்தம், குடிநீர்ப் பற்றாக்குறை, சுகாதாரக் கேடு, விவசாய உற்பத்தி வீழ்ச்சி, ரேஷன் பொருட்கள் கடத்தல், மணல் கொள்ளை ஆகியவற்றால் மக்கள் துயரத்தில் இருக்கும் சூழ்நிலையில், பண ஆசையையும், பதவி ஆசையையும் ஒரு சிலரிடம் காட்டியோ அல்லது வழக்குகளை காட்டி மிரட்டியோ அவர்களை தன் பக்கம் வரவழைத்து, தனக்கு மிகப் பெரிய ஆதரவு இருப்பது போல் ஒரு தோற்றத்தை உருவாக்க முயற்சிக்கிறார்.

விசுவாசம் கொண்ட உண்மையான தொண்டர்கள் தி.மு.க.வுடன் நிச்சயமாக கைகோர்க்க மாட்டார்கள். நாட்டு நலன் கருதி அ.இ.அ.தி.மு.க.வில் இணைத்துக் கொள்ள பெரும்பாலான தி.மு.கவினர் தயாராக இருக்கிறார்கள். இவையெல்லாம் விரைவில் தெரியவரும் என்பதை மட்டும் தெரிவித்துக் கொண்டு, அ.இ.அ.தி.மு.க ஏற்றமிகு வெற்றியினை ஈட்டி, எம்.ஜி.ஆர். ஆட்சி தமிழகத்தில் விரைவில் மலரப் போவது உறுதி என்பதை தெரிவித்துக் கொள்கிறேன்'' எ‌ன்று ஜெயலலிதா கூ‌றியுள்ளார்.