தொழில், கடமை, தியாகம், தொண்டு

by நாஞ்சில் குமார் Fri Apr 11, 2014 3:53 pm

குருமகான் வேதாத்திரி மகரிஷியின் சிந்தனை தொகுப்பிலிருந்து!

உடலியக்கத்தால் இயற்கையாக எழுகின்ற துன்பங்களைப் போக்கிக் கொள்வதற்கு உணவு, உடை, வீடு, வாழ்க்கைத்துணை மனிதனுக்கு தேவைப் படுகின்றன. இந்தத் தேவைகளை நிறைவேற்றும் முயற்சியில் மனிதனுடைய உடல் வலிவு, அறிவாற்றல் ஆகிய இரண்டும் பயன் படுத்தப்படுகின்றன. இதைத்தான் செயல் என்கிறோம்.

மனிதனுடைய செயல்களை தொழில், கடமை, தியாகம், தொண்டு என்று நான்கு வகையாகப் பிரிக்கலாம்.

1. ஒருவருடைய உடலின் இன்பம், பணம், பாசம் என்ற மூவகைக் குறிக்கோள்களைக் கொண்டு அவர் புரிகின்ற செயல் தொழில் எனப்படும்.
2. தான் வாழ்வதற்கு உதவியாயுள்ள சமுதாயத்திற்குப் பிரதிபலனாகக் கட்டாயமாக்க் செய்ய வேண்டிய செயல்கள் கடமை எனப்படும்.
3. குறிப்பிட்ட ஒரு நோக்கத்திற்காகவோ, ஒரு மனிதனுக்காகவோ, மனித குழு ஒன்றிற்காகவோ தன்னை அற்பணித்துக் கொள்கின்ற செயல் தியாகம் எனப்படும்.
4. இறைநிலையுணர்ந்து, செயல் விளைவு தத்துவத்தையுணர்ந்து, பேரறிவு எல்லையில் நிலைத்து தான் – தனது என்று குறுகி நிற்கும் எல்லையைக் கடந்தும் உலக மக்களின் வாழ்வின் நலத்திற்காகவே அற்பணித்து, எண்ணம், சொல், செயல் என்ற மூவகை ஆற்றல்களையும் பயன்படுத்துகின்ற பேரு நோக்கச் செயல் தான் தொண்டு எனப்படும்.