இசைப் பயணங்கள்!

by kanmani singh Tue May 27, 2014 5:24 pm

பயணங்கள் எப்போதும் இனிமையானவை
இந்த பாடல்களால்..
பேருந்துக்குள் ஆரவாரமாய்
ஒலிக்கும் பாடல்களின் ஓசையில்
ஓடி ஒளிந்துகொள்ளும்
சில சலிப்புகளும்
சம்பந்தமில்லா சலசலப்புகளும்..
நடத்துனரின் கட்டுப்பாட்டுக்குள்
குறுந்தகடு இருக்கையில்
குறைவாகத்தான் ஒலிக்கும் பாட்டுச்சத்தம்..
பயணசீட்டு கொடுக்கும் பாடு
பெரும்பாடாய் போகும்..
ஓட்டுனரின் கட்டுப்பாட்டுக்குள்
குறுந்தகடு இருக்கையில்
சற்றே அதிகமாக கேட்கும் பாட்டுச் சத்தம்..
சில பாடல்கள் பலருக்கு பிடிப்பதாகவும்
பல பாடல்கள் சிலருக்கு பிடிப்பதாகவும்..
காதல் பாடல்கள் தவழ்கையில்
கன்னியரின் முகங்களில்
நெளியும் நாணங்களும்
காளையரின் முகத்தில்
படரும் பரிகாசமும்..
சில நேரங்களில்
நேயர் விருப்பமாகவும் ஒலிக்கும் பாடல்கள்
ஓட்டுனர் நடத்துனர்
மன ஓட்டத்திற்கேற்ப..
பேருந்தில் பிதுங்கி வழியும் கூட்டத்திலும்
நிறைந்து வழியும் பாடல்கள்..
காற்றாடிக் கிடக்கும் வேளையில்
இருக்கைகளில் அமர்ந்திருக்கும் பாடல்கள்,
கம்பிகளை பற்றியபடி
நின்று கொண்டிருக்கும் பாடல்கள்..
சன்னலோரத்தில் இருக்கையில்
காதுக்குள் மோதும் காற்றோடு
முந்தி மோதும் பாடல்கள்
சுகமோ சுகம்..
இறங்கும் இடம் நெருங்குகையில்
நெஞ்சுக்கினிய பாடல் ஒலித்தால்
பேருந்தின் படியிறங்க
தயங்கி தடுமாறும் கால்கள்..
குறுந்தகடு பெட்டியை
திரும்பி பார்த்தபடி இறங்கிய அனுபவம்
பல நாட்களில்..
பேருந்துக்குள் பாடல் ஒலிக்காத நாட்களில்
பரிதவிக்கும் செவிகளும் மனமும்..
தவிப்பை கண்மூடி மறைக்க
தழுவிக் கொள்ளும் உறக்கம்!
பாடல்கள் இல்லாத பயணங்களை
ஒருபோதும் விரும்பியதில்லை..
பாடல்கள் உடனான பயணங்களில்
ஒருபோதும் உறங்கியதுமில்லை..
பேருந்து பயணங்களை
மறவாப் பயணங்களாக மனதில்
பதியவைத்ததும் இந்த பாடல்கள்தான்..
இன்னமும்
பயணத்திற்கு பேருந்துகளை
தேட வைப்பதுவும் இந்த பாடல்கள்தான்..
இனியும் இருக்காது
இசை இல்லாத ஒரு பயணம்!

by முரளிராஜா Wed May 28, 2014 10:43 am

பாடல் ஒலிக்கும் பேருந்தை தேடி சென்று பயணம் செய்த பழைய நினைவுகளை தட்டி எழுப்பியது உங்கள் கவிதை

by sreemuky Wed May 28, 2014 2:22 pm

மனதிற்கு பிடித்தவள் மறுபக்கம் நிற்க
மனம் மயக்கும் பாடல் பேருந்தை நிரப்ப
வரிகளின் தாக்கம் என் கண்ணின் வழியே
கிறங்கி நிற்கும் என் கண்மணியை தேட
அவளோ, கண்டும் காணாமல் புன்னகை புரிவாளே...
மறக்க முடியாத... மறுபடியும் கிடைக்காத நாட்கள்...

ஸ்ரீமுகி