லிங்குசாமி படத்திலிருந்து சிம்பு கழன்றாரா? கழற்றி விடப்பட்டாரா?

by **Admin** Tue Aug 03, 2010 10:30 am

ரன், ஆனந்தம், சண்டைக்கோழி, பீமா, பையா என தொடர்ந்து வெற்றிப் படங்களை தந்த இயக்குனர் லிங்குசாமியின் புதுப்படத்திலிருந்து, யங் சூப்பர் ஸ்டார் சிம்பு கழற்றி விடப்பட்டுள்ளார் என்ற செய்தி தற்சமயம் வெளியாகியுள்ளது.

அதற்குக் காரணம், விஜய் படத்தை இயக்குவதற்கான சந்தர்ப்பம் லிங்குசாமிக்கு கிடைத்திருப்பதாக கூறப்படுகின்றது. மறுபுறத்தில் கை நிறைய படங்களை வைத்துக் கொண்டு புதிதாக வானம் படத்தில் சிம்பு நடிக்க ஒப்பந்தமாகியிருப்பது லிங்குச்சாமி தரப்பில் எரிச்சலை உண்டு பண்ணியதாகவும் தெரிவிக்கப்படுகின்றது.

இதேவேளை விண்ணைத்தாண்டி வருவாயா? படத்திற்குப் பின், லிங்குசாமியின் படத்துக்காக 100 நாட்கள் காத்திருந்தேன். ஆனால் இப்போது வேறு ஒரு நடிகரை வைத்து இயக்கவிருப்பதாக அவர் கூறியுள்ளார். இது எந்த வகையில் நியாயம் என சிம்பு ஊடகங்களுக்கு தெரிவித்துள்ளார்.

இதுகுறித்து சிம்பு அளித்துள்ள அறிக்கை.

பூபதி பாண்டியன் இயக்கத்தில், லிங்குச்சாமியின் திருப்பதி பிரதர்ஸ் தயாரிப்பில் நடிக்க நான் ஒப்பந்தமானேன். ஆனால் பின்னர் நிலைமை மாறியது. படத்தை தயாநிதி அழகிரியின் கிளவுட் நைன் நிறுவனம் தயாரிக்கும், லிங்குச்சாமி இயக்குவார் என அறிவிக்கப்பட்டது.

ஆனாலும் நான் கிளவுட் நைன் நிறுவனத்துடன் எந்த ஒப்பந்தமும் செய்யவில்லை. மேலும் அவர்களுக்கு கால்ஷீட் கொடுக்கவும் இல்லை. தயாநிதி அழகிரி எனது நண்பர்தான். எங்களுக்கிடையே நல்ல உறவும் உள்ளது.

லிங்குச்சாமி தனது படத்தின் கதையை எனக்குச் சொல்வார் என, கிட்டத்தட்ட 100 நாட்கள் நான் காத்திருந்தேன். ஆனால் அவர் கதையையும் சொல்லவில்லை. எத்தனை நாள் கால்ஷீட் வேண்டும் என்பதையும் சொல்லவில்லை.

கதை வரும், ஸ்கிரிப்ட் வரும் என 100 நாள் காத்திருந்தது வீணாகிப் போய்விட்டது. இதையடுத்தே நான் வானம் படத்தில் நடிக்க ஒப்பந்தமானேன். இதை தயாநிதி அழகிரி, உலகக் கோப்பைக் கால்பந்து இறுதிப் போட்டியைப் பார்க்க தென் ஆப்பிரிக்கா புறப்படுவதற்கு முன்பே அவரிடம் தெரிவித்தேன்.

அதற்கு அவர், செப்டம்பர் 1ம் தேதி முதல் படப்பிடிப்பை தொடங்கலாம் என உறுதியாக தெரிவித்தார்.

இந்த நிலையில் தான் லிங்குச்சாமி என்னைப் படத்திலிருந்து நீக்கி விட்டதாக செய்திகள் வந்து அதிர்ச்சி அடைந்தேன். 100 நாட்களாக கதை கேட்க காத்திருந்த எனது நாட்களை வீணடித்து எப்படி லிங்குச்சாமி இப்படியொரு அறிவித்தலை விடுத்தார் என்பது புரியவில்லை? போடா போடி படத்தின் படப்பிடிப்பை முடித்துக் கொண்டு செப்டம்பர் 1ம் தேதி முதல் நான் அவரது படத்திற்காக தயாராகிவிடுவேன் என்பதையும் அவரிடம் சொல்லியிருந்தேன்.

ஆனால் இப்போது அவர் என்னை நீக்கி விட்டு இன்னொரு நடிகரை ஒப்பந்தம் செய்யவுள்ளதாக கூறியுள்ளார். இது முற்றிலும் தொழிலுக்கு விரோதமானது, இப்படி அவர் செய்திருக்கக் கூடாது என சிம்பு கடுந்தொனியில் கூறியுள்ளார்.

இந்த நிலையில் தற்போது, காவல் காதல், வேலாயுதம் ஆகிய படங்களில் நடித்துவரும் விஜய் அதற்குப் பின்னர் லிங்குசாமி இயக்கத்தில் நடிக்க சம்மதம் தெரிவித்துள்ளதாக செய்திகள் தெரிவிக்கின்றன.

படத்தை கிளவுட் நைன் மூவிஸ் சார்பாக தயாநிதி அழகிரி தான் தயாரிக்கப் போகின்றார்.

லிங்குசாமி படத்திலிருந்து சிம்பு கழன்றாரா? கழற்றி விடப்பட்டாரா? Aimpu