காலக் குளம்!

தெப்பக்குளப் படிக்கட்டுகளில்
தேங்கிய பாசிகளில் வழுக்குகிறது உன் நினைவுகள்!
கை நிறைய பொரியோடும்
மனம் நிறைய காதலோடும்
அடுத்தடுத்த படிகளில் அமர்ந்து
பேசித் தீர்த்த பொழுதுகள்
குளத்து நீர் பசுமைபோல
ஊறிக் கிடக்கிறது கண் முன்னே!
நீ அள்ளிப் போடும் பொரிக்காக
கூடி வரும் மீன் கூட்டங்களைக் கண்டு
ஆசையாய் ரசிக்கும் உன் பரவசங்களை
படம் பிடித்த பதிவுகள்
அலையாடுகின்றன நீர்பரப்பில்
வட்ட வட்டமாய்....
வழுக்கி விடாதிருக்க உன் கரம் பிடித்து
குளத்து நீரில் கால் நனைப்பேன்..
காதலில் மனம் வழுக்கினாலும்
குளத்தில் கால் வழுக்காமல் கரையேற்றினாய்
வாழ்க்கையை காலக்குளத்தில்
மூழ்கடித்து விட்டாய்..
நேற்று போயிருந்தேன் கோயிலுக்கு
தெப்பக்குளத்துக்கும்...
கைகளில் பொரியிருந்தது
மனம்தான் வெறுமையாய் இருந்தது!

மிக மிக அழகான அருமையான கவிதை.
பகிர்ந்த சகோதரிக்கு நன்றி