என் ரகசிய காதலன்!

" />


உன்னோடு ஊடாடிய பொழுதுகள்
உள்ளுக்குள் குளிர்கிறது...
நீ நனைத்த பகல்களிலும் இரவுகளிலும்
ஒளியுமில்லாத இருளிமில்லாத
மந்தகாச தருணம் கிடைத்தது...
நீர் விழுதுகள் பிடித்து
ஊஞ்சலாடிய தருணங்கள்
என் உயிர் பதிவுகள்..
குடை பிடித்து உன்னை
நிராகரிக்க தெரியாத விருப்பத்தின் வெப்பம்
நீயறியாததில்லை...
புல்மீதும் பூமீதும்
நீ வீழ்ந்தோடியதைவிட
என் விரல்களில் அதிகம் வழிந்தோடியிருக்கிறாய்..
பூமியின் மீதான உன் தழுவல்களை காட்டிலும்
என்மீதான உன் தழுவல்கள்
மோகத்தின் சாரம் கொண்டவை..
என் ஸ்பரிசத்தை சந்திக்க வரும் நீ
என் சிலிர்ப்புகளை சிலாகித்து சென்றிருக்கிறாய்..
உன் மின்னல் புன்னகையும்
இடியின் மேளதாளமும்
எனக்கான சங்கேத ஒலிகளாயிருந்தன..
உன் தென்றல் நடையும் தெரியும்
உன் புயல் ஓட்டமும் தெரியும்..
உன் மெல்லிசையும் நானறிவேன்
உன் துள்ளிசையும் நானறிவேன்..
சில்லென எரியும்
உன் மோகத்தீயில் வெந்து தணிவேன் நான்..
உன் ஈர முத்தங்களில்
மயங்கி தீர்கின்றன
நாணமில்லா நிமிடங்கள்..
உனக்குள் அடங்கிக் களிப்பதும்
உன்னோடு ஆர்ப்பரித்து அணைவதும்
உன் அடங்காப் பெருவேகத்தில்
மகிழ்ந்து கலைவதும்
மரணமில்லா மாயப் பொழுதுகள்..
மழையே..
நீ என் ரகசிய காதலன்!

அருமை அருமை
தொடருங்கள்
ரசித்தேன்