கழுதைப் பால் கொடுப்பதால் குழந்தைகளுக்கு எந்த நன்மையும் இல்லை: மருத்துவ நிபுணர் தகவல்

[img][You must be registered and logged in to see this image.][/img]
-
குரோம்பேட்டை பாலாஜி மருத்துவக் கல்லூரியில் நடைபெற்ற தாய்ப் பால் வார விழாவில் பங்கேற்ற வி.மாதினிக்கு நினைவுப் பரிசு வழங்குகிறார் கல்லூரித் துறை தலைவர் கே.சரஸ்வதி.
---------------------
குழந்தைகளுக்கு கழுதைப் பால் கொடுப்பதால் எந்த நன்மையும் கிடையாது. தாய்ப்பால்தான் சிறந்தது என்று சென்னை எழும்பூர் அரசு மகப்பேறு மருத்துவமனையின் முன்னாள் இயக்குநர் வி.மாதினி கூறினார்.

குரோம்பேட்டை ஸ்ரீபாலாஜி மருத்துவக் கல்லூரி கல்லூரி மகப்பேறு மருத்துவத் துறை சார்பில் உலகத் தாய்ப்பால் வார விழாவின் தொடக்க நாள் நிகழ்ச்சி திங்கள்கிழமை நடைபெற்றது.

இதையொட்டி, வளர் இளம்பெண்களுக்கு விழிப்புணர்வு ஏற்படுத்தும் வகையில் வி.மாதினி பேசியதாவது:

முந்தைய காலத்தில் குழந்தைகளுக்கு தாய்ப்பாலை பிறந்த சில ஆண்டுகள் வரை அளித்து வந்தனர். இதன் பின்னர், அழகு கெடும் என்று கருதி, ஓரிரு மாதங்கள் வரை தாய்ப்பால் கொடுத்துவிட்டு, பின்னர் வேறு இணை உணவுகளை பெண்கள் அளித்தனர். இதனால், குழந்தைகளுக்கு நோய் எதிர்ப்புச் சக்தி குறைகிறது. தாய்ப்பாலின் அவசியத்தை வலியுறுத்தும் வகையில், இப்போது பெண்களுக்கு தாய்ப்பாலின் மகத்துவம் பற்றிய விழிப்புணர்வை அரசு ஏற்படுத்தி வருகிறது. இதற்காக, வளர் இளம்பெண்கள், கர்ப்பிணிகளுக்கு அவ்வப்போது பயிற்சிகள் அளிக்கப்பட்டு வருகின்றன. குழந்தை பிறந்தவுடன், தாய்க்கு ஆக்ஸிடோஸின் எனும் ஹார்மோன் சுரக்கிறது. இந்த ஹார்மோன் குழந்தைக்கான தாய்ப்பால் செயல்பாட்டை உறுதி செய்கிறது. குழந்தைக்கு 6 மாதங்கள் வரை தவறாமல் தாய்ப்பால் கொடுப்பது அவசியம். அதன் பின்னரே தாய்ப்பாலுடன் இணை உணவை அளிக்க வேண்டும்.

குழந்தைகளுக்கு கழுதைப் பால் கொடுப்பதால் எந்தப் பலனும் கிடையாது. இது தவறான நம்பிக்கையாகும். மேலும், தாய்ப்பால் அதிகம் கொடுக்கும் பெண்களுக்கு மார்பகப் புற்றுநோய், கர்ப்பப்பை புற்றுநோய் வருவது மிகக் குறைந்த அளவில் உள்ளது என்று நீரூபிக்கப்பட்டுள்ளது என்றார் அவர்.

விழாவில் ஸ்ரீபாலாஜி மருத்துவக் கல்லூரி இயக்குநர் ராஜகோபால், துணை முதல்வர் சாய்குமார், மகப்பேறு துறைத் தலைவர் கே.சரஸ்வதி, குழந்தைகள் நலன் துறைத் தலைவர் எஸ்.சுந்தரி உள்பட பலர் பங்கேற்றனர்.

தினமணி

தகவலுக்கு நன்றி