தமிழகத்தில் முதல்முறையாக கோவை சிறையில் திருநங்கைகளுக்கு தனி அறை

தமிழகத்தில் முதல்முறையாக, கோவை மத்திய சிறையில்
திருநங்கைகளுக்கு என தனி அறை அண்மையில் தொடங்கப்
பட்டுள்ளது.

கோவை மத்திய சிறையானது சுமார் 60 ஏக்கர் பரப்பளவில்
1872-ஆம் ஆண்டு முதல் செயல்பட்டு வருகிறது. இங்கு, தற்போது
1,700 ஆண் கைதிகளும், 60-க்கும் மேற்பட்ட பெண் கைதிகளும்
உள்ளனர்.

இந்தச் சிறை வளாகத்தில் சுமார் 3 ஏக்கர் பரப்பளவில் உள்ள
விசைத்தறிக் கூடத்தில், ஆண்டுக்கு 5 லட்சம் காவலர் சீருடைகள்
உற்பத்தி செய்யப்பட்டு, பல்வேறு மாவட்டங்களுக்கு அனுப்பி
வைக்கப்படுகின்றன.

அதேபோல, புத்தக பைண்டிங், கட்டு நூல், கொசு வலை உள்ளிட்ட
பல்வேறு பொருள்களையும் கைதிகள் உற்பத்தி செய்கின்றனர்.
சிறைக் கைதிகள் படிக்கத் தேவையான அனைத்து உதவிகளையும்
சிறை நிர்வாகம் அளிக்கிறது.

சிறையில் இன்னலுக்கு ஆளாகும் திருநங்கைகள்: தமிழகத்தின்
பல்வேறு சிறைகளில் திருநங்கைகளை எந்தப் பிரிவில் அடைப்பது
என்ற குழப்பம் நிலவும். ஒருசில சிறைகளில் அவர்கள் மிகுந்த
இன்னலுக்கு ஆளாவதாகவும் புகார்கள் எழுந்துள்ளன.
இதனால், அவர்கள் மன ரீதியாகவும் பாதிக்கப்படுகின்றனர்.

கோவை மத்திய சிறைக்கு பல்வேறு வழக்குகள் தொடர்பாக
அழைத்து வரப்படும் திருநங்கைகள், மருத்துவப் பரிசோதனைக்குப்
பிறகு ஆண்கள் மற்றும் பெண்கள் சிறைகளில் தனித்தனியாக
அடைக்கப்பட்டு வந்தனர். இந்நிலையில், கோவை மத்திய சிறையில்
பெண்களுக்கான பிரிவில் திருநங்கைகளுக்கென தனியாக அறை
ஒதுக்கப்பட்டுள்ளது.

இந்த அறையில் 6 பேர் வரை இருக்கலாம். குளியலறை, கழிப்பறை
உள்ளிட்ட வசதிகளும் அந்த அறையில் உள்ளன. சிறை அதிகாரிகளின்
நேரடிக் கண்காணிப்பில் இருக்குமாறு இந்த அறை வடிவமைக்கப்
பட்டுள்ளது. இந்தப் புதிய அறையானது கடந்த மூன்று மாதங்களுக்கு
முன் செயல்பாட்டுக்கு வந்ததாக சிறைத் துறை அதிகாரி ஒருவர்
தெரிவித்தார்.

இதேபோல தமிழகத்தில் உள்ள அனைத்து சிறைகளிலும்
திருநங்கைகளுக்கென தனி அறைகள் தொடங்கப்பட்டால், அவர்களுக்கு
சிறையில் ஏற்படும் இன்னல்கள் குறையும். இதற்கு அரசு நடவடிக்கை
எடுக்க வேண்டும் என்பதே சமூக ஆர்வலர்களின் கோரிக்கையாக
உள்ளது
–
——————————————–
தினமணி