அடுத்தொரு சந்திப்பு...

இது எப்படி நிகழ்ந்தது என்று
என்னையே கேட்டுக் கொள்கிறேன்..
விபத்துபோலிருக்கிறது என்றும் சொல்லலாம்..
இன்னமும் எவ்வாறென்று
அறிந்தபாடில்லை என்றும் சொல்லலாம்....
அந்நேரம் பெய்த மழை அறியுமோவென்றும்
அறிய முடியவில்லை...
மழை வந்தபின் சந்தித்தோமா
நாம் சந்தித்ததால் மழை வந்ததா..
உள்ளத்துக்குள் கனமழை கொட்டியதால்
ஊருக்குள் பெய்த மழையை உணர முடியவில்லை...
ஒரே வினாடியில் கடக்கும் தொலைவை
நிமிடங்களில் கடக்கையில்
எனக்கு மட்டும்தான் இதயம் கனத்ததா
உனக்குமா....
திரும்பி பார்க்க எனக்கு தோன்றியதுபோல்தான்
உனக்குமா...
அப்போதுதான் மழையை கவனித்தேன் நான்
உன் முகத்தில்
சில்லென்று சிலிர்த்தேன் நான்...
உனக்குள் என்ன உணர்வென்று
குறிப்பறிவிக்கவில்லை உன் முகம்...
நீர்த்திரை விலக்கி
நிஜம் காண
எத்தனை போராட்டம்...
ஒற்றை சந்திப்பில் ஒரு கோடி கனவுகளை
விதைத்துச் சென்றது நீ மட்டுமா
நானும்தானா....
விதையிட்டு நீர்விட்டு உரமிட்டு வளர்த்துவிட்டது
நீயோ நானோ
அபார வளர்ச்சியாயிற்று...
அதற்கு காதலென்று பெயருமாயிற்று...
ஆனாலும் அமையாமல் போயிற்று
அடுத்தொரு சந்திப்பு!