மனைவியுடன் கணவன் கட்டாய உறவு: குற்றமாக்கும் எண்ணமில்லை: மத்திய அரசு

புதுடில்லி:
மனைவியுடன் கணவன் கட்டாய உறவு கொள்வதை குற்றமாக
அறிவிக்கும் எண்ணம் ஏதுமில்லை என மத்திய அரசு டில்லி
ஐகோர்ட்டில் கூறியுள்ளது.

தொண்டு நிறுவனத்தை சேர்ந்த மோனிகா அரோரா என்பவர்,
கணவன் மனைவியுடன் கட்டாயமாக உறவு வைப்பதை குற்றமாக
அறிவித்து நடவடிக்கை எடுக்க வேண்டும் என டில்லி ஐகோர்ட்டில்
மனு தாக்கல் செய்தார்.

இந்த வழக்கு தலைமை நீதிபதி கீதா மிட்டல், ஹரி சங்கர் பெஞ்ச்
முன்பு விசாரணைக்கு வந்தது.

மனு தாரர் சார்பில் ஆஜரான வழக்கறிஞர், மனைவியுடன்
கணவன் கட்டாய உறவு கொள்வது அரசியல் சாசனத்துக்கு
எதிரானது. இதன் மூலம் வலுக்கட்டாயமாக உறவு கொள்ள
கணவர்களுக்கு கல்யாணம் ஒரு கருவியாக பயன்படுத்தப்படும்.

தனது உடல் குறித்து திருமணமாகாத பெண்களுக்கு உள்ள
உரிமை, திருமணமான பெண்களுக்கும் வழங்கப்பட வேண்டும்
என வாதாடினார்.

இந்த வழக்கில் ஆண்கள் சங்கம் சார்பில் டில்லி ஐகோர்ட்டில்
முறையீடு செய்யப்பட்டது. அதில், 375வது பிரிவு சட்டப்படி,
கணவர்களுக்கு வழங்கப்பட்டுள்ள பாதுகாப்பை நீக்கினால்,
அப்பாவி கணவர்கள் பாதிக்கப்படுவார்கள். கற்பழிப்பு,
பாலியல் தொந்தரவு என பொய் புகார் அளிக்க வாய்ப்பு
உள்ளதாக கூறப்பட்டது.

இந்த வழக்கில் மத்திய அரசு பதில் மனு தாக்கல் செய்தது.
அதில், மனைவியுடன் கட்டாய உறவு வைப்பதை குற்றமாக
அறிவிக்கும் திட்டமில்லை. மனைவியுடன் கணவன் கட்டாய
உறவு வைப்பதை குற்றம் என சட்டமாக்கினால்,
அது திருமண பந்தம் சீர்குலைப்புக்கும், கணவர்களை
துன்புறுத்துவதற்கும் பயன்படும். இவ்வாறு அதில்
கூறப்பட்டுள்ளது.
-
------------------------------------
தினமலர்