கோவிலுக்கு யானை தானம் கேரளாவில் கடும் எதிர்ப்பு

திருவனந்தபுரம், :
கேரளாவில், கோவிலுக்கு யானையை தானமாக வழங்குவதற்கு
எதிர்ப்பு தெரிவித்து, விலங்குகள் நல அமைப்பு, போர்க்கொடி
துாக்கி உள்ளது.

கேரள மாநிலம், கொல்லம் அருகே, ஸ்ரீகிருஷ்ணர் கோவிலுக்கு,
தனிநபர் ஒருவர், யானையை தானமாக வழங்க முடிவு செய்து
உள்ளார்.இதற்காக, கோவில் வளாகத்தில், செப்., 12ல் நிகழ்ச்சி
நடக்கிறது;

திருவாங்கூர் தேவசம் போர்டு தலைவர், கோபாலகிருஷ்ணனிடம்,
யானை தானம் வழங்கப்படுகிறது.இந்நிகழ்ச்சி, உச்ச நீதிமன்ற
தீர்ப்புக்கு எதிராக நடப்பதாகக் கூறி, அம்மாநிலத்தைச் சேர்ந்த,
விலங்கின நல அமைப்பான, 'ஹெரிடேஜ் அனிமல் டாஸ்க் போர்ஸ்'
எதிர்ப்பு தெரிவித்துள்ளது.

நிகழ்ச்சியை தடுத்து நிறுத்தக்கோரி, டி.ஜி.பி., யிடம், அந்த
அமைப்பினர் மனு அளித்து உள்ளனர். அதன் விபரம்:கோவில்கள்
மற்றும் சில குறிப்பிட்ட இடங்களில் மட்டுமே, யானையை
பராமரிக்க வேண்டும்; தனிநபர்கள் யானைகள் வைத்திருக்க,
உச்ச நீதிமன்றம் ஏற்கனவே தடை விதித்துள்ளது.

கொல்லம் கிருஷ்ணர் கோவிலுக்கு, தானம் வழங்கும் நபர்,
யானையை சொந்தமாக வைத்திருக்க இயலாது; அதற்கான
ஆவணங்கள் ஏதுமிருக்க வாய்ப்பில்லை.

தனிநபர்களிடம் இருந்து கோவில் நிர்வாகம், யானையை தானமாக
பெறுவது, உச்ச நீதிமன்ற தீர்ப்புக்கு எதிரானது; எனவே, இதை
தடுத்து நிறுத்த வேண்டும்.இந்த விவகாரத்தில், மத்திய சுற்றுச்சூழல்
மற்றும் வனத்துறை அமைச்சகம் தலையிட்டு நடவடிக்கை எடுக்க
வேண்டும். இவ்வாறு அதில் கூறப்பட்டுள்ளது.
-
---------------------------------------
தினமலர்