தளிர் நடை

தளிர் நடை

கருவாகி உருவாகி
கரமேறி கழுத்தணைந்து
காதோரம் கணண்ற உன்
சுவாசம் உணர்ந்தவன் நான்

என் மல்லாந்த நெஞ்சேறி
உன் நெஞ்சணைத்து உறங்கையிலுன்
உள்ளிதய தாளமதை
உணர்ந்தவன் நான்

தரையிறங்கித்
தவழ்ந்துழன்று
தள்ளாடி
தடம்புரண்டு
மல்லாந்து பல்லில்லா
பொக்கை பூக்கவுன்
பொங்கி மகிழ்ந்தவன் நான்

ஆடியடங்கி நீ
அயர்ந்துறங்கையில்
அருகிருந்துவுன்
கனவுச்சிரிப்பினில்
கரைந்து போனவன் நான்

தவழ்ந்தெழுந்து நீ
தள்ளாடி சுவர்பிடித்து
தலைதிருப்பி இறுமாந்து
சிரித்த அந்நொடியில் சிகரமாயுணர்ந்தவன் நான்

பிடிமானமெதுவுமின்றி
அடியொன்றெடுத்து வைத்து
தள்ளாடித் தொப்பென்று
தடுமாறி விழுகையில் நீ
உள்ளம் பதறி
அள்ளியெடுத்தவன் நான்

மெல்லென நிலை பெற்று
ஓரடி ஈரடி யாய்
காலடி எடுத்து வைத்து
நிமிர்ந்து நீ நிற்கையிலே
அகிலம் வென்றவனாய்
கிரீடம் சூடிக்கொண்டேன்

விரல்பிடித்தென் விழாமல் அடிதொடர்ந்து
மெல்ல நீ நடக்கையிலே உன்
துணையாய் தோழனாய்
பதவிமாறிக்கொண்டேன் நான்

விரல் விட்டென்
துணையுதறி நீ
தனியே அடியெடுத்து
தள்ளாடி நடக்கையிலே
கண்ணம்மா
கண்கலங்கி நின்றேன் நான்

இன்று தளிர்
நடை போட்டு
நடக்குமுன்
அழகு கண்டு
நாளையுண்
உலகையுணக்கு
கட்டித்தர வேண்டுமென்ற
கட்டாய கடமையுணர்ந்து
இன்றே கனவு கொண்டேன்

கண்ணம்மா நீதானேயென்
கண்ணம்மா

-தமிழினியன் பிரபாகரன்-