நட்புக்கு அழகு - திருக்குறள் கதைகள் 20

பாபுவும் மணியும் ஒரே வகுப்பில் படிக்கும் நெருங்கிய நண்பர்கள். பாபுவிடம் ஒரு கெட்ட பழக்கம் உண்டு. யாரிடமிருந்தும் எதையும் இரவல் வாங்கினால், அதைத் திருப்பித் தர மாட்டான். அந்தப் பொருளை தனதாக்கிக் கொள்ள வேண்டுமென்ற இழிந்த நோக்கத்தால் அல்ல; இரவல் வாங்கியதையே மறந்து விடுவான், அவ்வளவு தான்!

மணியிடம் அடிக்கடி பேனா, பென்சில் ஸ்கேல் என அடிக்கடி இரவல் வாங்குவான் பாபு. ஆனால் வாங்கிய பிறகு அதைத் திருப்பித் தர வேண்டும் என்ற நினைவே வராது. இதைப் பற்றி பாபுவிடம் எடுத்துக் கூற வேண்டும் என்று மணி பலமுறை நினைத்ததுண்டு. ஆனால் அதை பாபு தவறாக எடுத்துக் கொள்வானோ என்ற எண்ணத்தால், மணி இரவல் கொடுத்ததை கேட்பதேயில்லை.

ஒருமுறை மணியிடம் பாட புத்தகமொன்றை பாபு வாங்கிச் சென்றான். எடுத்துச் சென்று பல நாட்களாகியும் அதை அவன் திருப்பித் தரவில்லை. அது மிக முக்கியமான புத்தகம் என்பதால் மணிக்கு தர்மசங்கடமகி விட்டது. ஒருநாள் மற்றொரு நண்பனான கோபுவிடம், " பாபு என் விஞ்ஞான புத்தகத்தை எடுத்துச் சென்று பத்து நாட்கள் ஆகின்றன. இன்னும் திருப்பித் தரவில்லை. அவனது இந்தப் பொறுப்பற்ற குணம் எனக்குப் பிடிக்கவில்லை," என்று புலம்பினான்.

கோபு சும்மாயிருக்காமல், இந்த விஷயத்தை வகுப்பிலுள்ள பல நண்பர்களிடம் கூறி விட்டான். வகுப்பிலுள்ள நண்பர்கள் "என்னடா பாபு, உனக்கு இரவல் மன்னன் பட்டம் கொடுக்கலாம் போலிருக்கே. நீ சொந்தமாக எதையும் வாங்க மாட்டாயா" என கிண்டலடித்தனர். இதனால் பாபுவுக்கு ஆத்திரமும், அவமானமும் ஏற்பட்டது.

தன்னைப் பற்றி அவதூறு பரப்பியது மணி தான் என நினைத்துக் கொண்டு, அவனிடம் சென்று " இது வரை நீ இரவல் கொடுத்ததற்கு நன்றி. எனக்கு மறதி இருப்பது உனக்குத் தெரியும். அப்படியிருந்தும் நீ என்னிடம் நேரடியாக வந்து கேட்காமல் மற்றவர்களிடம் குறை கூறியது தவறு" என கோபமாகக் கூறி புத்தகத்தை திருப்பிக் கொடுத்தான்.

அன்றுடன் அவர்களது நட்பும் முறிந்தது. பாபுவின் தவறை நேரடியாக அவனிடம் கூறியிருந்தால் இந்த சிக்கல் ஏற்பட்டிருக்காதே என, மணி மனம் வருந்தினான்.

வள்ளுவரும் அதைதான் வலியுறுத்துகிறார்.

கண்ணின்று கண்ணறச் சொல்லினுஞ் சொல்லற்க
முன்னின்று பின்னோக்காச் சொல்

விளக்கம்: ஒருவனுடைய தவறை அவனிடமே நேரிடையாகக் கடுமையாகக் கூறலாம். ஆனால் அவன் நேரில் இல்லாத போது அவனைப் பற்றி குற்றம் கூறக் கூடாது.

நன்றி அம்புலிமாமா