முன்னோர் வழங்கிய மூலிகை: நல்ல வேளை

ஆனந்தம் பொங்கி அறிவோடு
இருப்பவர்க்கு குதம்பாய்
ஞானந்தான் ஏதுக்கடி?

எந்த ஒரு செயலை செய்யும் போதும் நல்லவேளை பார்ப்பது நடைமுறை. நல்லவேளை என்பது நல்ல காலம் எனலாம். நமக்கு நல்ல காலத்தை கொடுக்கும், ஒரு மூலிகை தான் (Cleome Gynandra) நல்லவேளை. நீண்ட காம்புடன் விரல்கள் போல விரிந்து இருக்கும். கிளையில் வாசனை நிரம்பிய இலைகளை கொண்டது. சிறிய வெண்ணிற மலர்கள் பூக்கும். சில இடங்களில் வெண்மையும் கரும் சிவப்பு கலந்தும் காணப்படும். தமிழகம் முழுவதும் சாலையோரம் மற்றும் வயல் வரப்புகளில் தழைத்து கிடக்கும் குறுஞ்செடி இதுவாகும். தை வேளை எனப்பல பெயர்களால் அழைக்கப்படுகிறது.

நல்லவேளைப்பூண்டை நாடுங்கால் வாதமும்
சொல்லுமை யத்துடனே சோபையறும்- மெல்ல மெல்ல
தக்கவன லும்பித்துந் தானெரும்புஞ் சாந்தமின்றி
அக்கரநோய் மிஞ்சுமறி என்கிறது அகத்தியர் குணபாடம்.

இதன் இலையானது தலை நோய், குடைச்சல், மார்பு வலி, சோபை நீக்கும். பசியை உண்டாக்கும். இதன் பூவானது கோழையை அகற்றி பசியை உண்டாக்கும் தன்மை கொண்டது.. விதைகள் இசிவு அகற்றும். குடல் வாயு அகற்றியாகவும் செயல்படும். சிலருக்கு தீராத தலைப்பாரம் இருந்து கொண்டே இருக்கும். வேதனை தாங்காமல் சுவற்றில் போய் தலையை முட்டுவார்கள். அவர்கள் நல்லவேளை செடியை கொண்டு வந்து முழுமையாக இடித்து சாறை பிழிந்து விட்டு சக்கையை தலையில் வைத்து துணியால் கட்டி கொண்டால் பாரம், தலை குடைச்சல் தீரும்.

வாழ்வில் எத்தனையோ செல்வங்கள் வந்தாலும் சந்தேகம் என்ற நோய் வந்தால் நிம்மதியாக வாழமுடியாது. கணவன் மனைவிக்கிடையே ஏற்படும் சந்தேகநோய், அவர்களை மனநோயாளியாகவே மாற்றிவிடும். இதன் இலையை பறித்து அதனுடன் அரைக்கீரையை கலந்து சாப்பிட்டு வந்தால் சந்தேகநோய் போகும். மனம் அமைதியடையும். இலையை ஒருபிடி எடுத்து சுக்கு ஒரு துண்டு 6 மிளகு, சீரகம் ஓரு சிட்டிகை எடுத்து ஓன்றிரண்டாக சிதைத்து அரைலிட்டர் தண்ணீரில் போட்டு 200 மிலியாக சுண்ட காய்ச்சி எடுத்து அதில் வேளைக்கு 50மிலி என மூன்று வேளை குடித்து வந்தால் வாதசுரம், சீதளச்சுரம் போகும்.

காதில் சீழ் வடிதலை போக்க நல்லவேளை இலை சாற்றை ஒன்று அல்லது இரண்டு சொட்டு விடலாம். இலையை குழம்பு, சாம்பார் செய்து சாப்பிட்டால் வாயு நோய் போகும். பூவை நெய் விட்டு வதக்கி துவையல் செய்தும் சாப்பிடலாம். குழந்தைகளுக்கு ஏற்படும் கபம், கணை மாந்தம், சளி நிறைந்து மூச்சுத்திணறல், சுரம் நீர்க்கோவை ஆகியவற்றுக்கு பூவின் சாற்றை எடுத்து மெல்லிய துணியில் வடிகட்டி பாலாடை அளவு தாய்ப்பாலில் கலந்து கொடுக்கலாம். சீழ் பிடித்த கட்டிகள் உடையாமல் இருந்தால் இலையை அரைத்து பற்றுபோட்டால் கட்டி உடைந்து ஆறும்.

குழந்தைகள் மற்றும் பெரியவர்களுக்கு பெரிதும் தொல்லை கொடுக்ககூடியது தட்டை புழுக்கள். மலக்குடலில் உள்ள இவை ஆசன வாய் வழியாக வெளியேறும் போது கடும் அவஸ்தை ஏற்படுத்தும். அதற்கு நல்லவேளை விதையை நெய் விட்டு வதக்கி பொடித்து சிறுவர்களுக்கு அரை கிராம், பெரியவர்களுக்கு 4கிராம் அளவில் காலை மாலை கொடுக்க வேண்டும். 4ம் நாள் அதிகாலையில் விளக்கெண்ணெயை பேதிக்கு கொடுக்க குடலில் உள்ள தட்டை புழுக்கள் அழியும். சில புண்கள் ஆறாமல் புழு வைத்து துன்பப்படுவார்கள் அதற்கு விதையை அரைத்து எலுமிச்சை சாறு விட்டு புற்றுபோட புழுக்கள் மடிந்து புண் ஆறும்.

நல்லவேளை மூலிகை நன்மையை தரக்கூடிய மூலிகையாகும்.

நன்றி: தினகரன்

 புதிய தகவல்.பகிர்வுக்கு நன்றி