ஐ ட்யூன்ஸ் வயது 10

by சிவா Mon May 13, 2013 8:47 am

சில ஆண்டுகளுக்கு முன்பு, நம் எம்பி3 பிளேயருக்கான பாடல்கள் தேவை என்றால், சிடியில் பதிந்துள்ள பாடல்களை அதற்கென கிடைக்கும் சாப்ட்வேர் மூலம், பிரித்தெடுத்து தனி பைலாக அமைத்துப் பயன்படுத்த வேண்டும். ஆனால், ஐ ட்யூன்ஸ் மியூசிக் ஸ்டோர் வந்த பின்னர், இந்த நிலை மாறியது. பத்தாண்டுகளுக்கு முன்னால், ஏப்ரல் 28, 2003ல் தொடங்கப்பட்ட ஐ ட்யூன்ஸ் மியூசிக் ஸ்டோர், இன்று இசை உலகின் தொட்டிலாக இயங்கி வருகிறது. இரண்டு லட்சம் பாடல்களுடன், தொடங்கப்பட்ட இந்த ஐ ட்யூன்ஸ் ஸ்டோர், இன்று மூன்று கோடியே 50 லட்சம் பாடல்களுக்கும் மேலாகக் கொண்டு, 119 நாடுகளில், இயங்கி வருகிறது. நம் மொபைல் போன்களிலேயே நேரடியாக டவுண்லோட் செய்து பாடல்களைப் பயன்படுத்தலாம். ஐ ட்யூன் ஸ்டோருக்கு முன்னால், இது சாத்தியமே இல்லை. இதே ஸ்டோர், 109 நாடுகளில் திரைப்படங்களை விற்பனை செய்கிறது. 155 நாடுகளில் நூல்களை விற்பனைக்குக் கொண்டு வந்துள்ளது.
ஐ ட்யூன்ஸ் ஸ்டோருக்கு முன்பாக, Rhapsody, PressPlay, and eMusic எனச் சில இணைய இசை வர்த்தக தளங்கள் இயங்கின. ஒரு மாதத்தில் இத்தனை தான் டவுண்லோட் செய்திட வேண்டும் என்ற வரையறையை இவை கொண்டிருந்தன. தரவிறக்கம் செய்யப்படும் பாடல்களை இசைத்துக் கேட்கவும் சில வரையறைகள் இருந்தன.
ஆனால், ஆப்பிள் நிறுவனம்,ஐ ட்யூன்ஸ் ஸ்டோரினை அமைத்ததன் மூலம், மியூசிக் உலகை இன்றைய டிஜிட்டல் உலகத்திற்கு முழுமையாக இழுத்து வந்தது. இதனைப் பார்த்து, Microsoft, Virgin, Real Networks, Sony, and Walmart ஆகிய நிறுவனங்களும் மியூசிக் விற்பனை ஸ்டோர்களைத் தொடங்கின. ஆனால், இன்று ஆப்பிள் நிறுவனத்தின் ஐ ட்யூன்ஸ் மற்றும் ஐபாட் சாதனம் மட்டுமே டிஜிட்டல் இசை உலகின் அடையாளங்களாகத் திகழ்கின்றன. கட்டணம் செலுத்தி, பாடல்களை வாங்கும் பிரிவில், 63 சதவீதப் பங்கினை இன்று ஆப்பிள் நிறுவனம் தக்க வைத்துக் கொண்டுள்ளது.
இது புதிய டிஜிட்டல் முயற்சியாக இருந்ததால், மக்களின் ஆதரவு பலமாக இருந்தது. ஐ ட்யூன்ஸ் ஸ்டோர் தொடங்கியவுடன், முதல் வாரத்திலேயே 10 லட்சம் பாடல்கள் இறக்கம் செய்யப்பட்டன. அந்த ஆண்டின் இறுதியில், இந்த எண்ணிக்கை 2 கோடியே 50 லட்சமாக உயர்ந்தது.
தற்போது ஐட்யூன்ஸ் விற்பனை, இசைப் பாடல்களையும் தாண்டி, திரைப்படங்கள், நூல்கள் விற்பனை என விரிந்துள்ளது. அதனாலேயே ஐட்யூன்ஸ் மியூசிக் ஸ்டோர் என்றிருந்ததில், மியூசிக் என்பது எடுக்கப்பட்டுவிட்டது. இன்னும் பல மாற்றங்களை ஐ ட்யூன்ஸ் ஸ்டோரில் எதிர்பார்க்கலாம்.

நன்றி:http://www.dinamalar.com/