தண்ணீரை காசு போல செலவிடாதீர்

by முழுமுதலோன் Fri Mar 21, 2014 11:38 am

முன்பெல்லாம் பணத்த தண்ணீரா செலவழிக்கிறாங்க என்று கணக்கு வழக்கில்லாமல் பணத்தை செலவு செய்வதற்கு ஒரு உவமை கூறுவார்கள். இப்போது நடப்பது கலி காலம் என்பதால், இந்த உவமை அப்படியே திரும்புகிறது.

ஆம், ரூபாயின் மதிப்பு சரிந்து பொருட்களின் விலை பல மடங்கு உயர்ந்து, தண்ணீரை கூட காசு கொடுத்து வாங்கும் நிலையில் நாம் உள்ளோம்.

எனவே, இந்த சூழ்நிலையில், தண்ணீரை காசு போல செலவிடாதீர்கள் என்று கூறினால்தான் பொருத்தமாக இருக்கும்.

சரி விஷயத்துக்கு வருவோம்...

பொதுவாக நிலத்தை தோண்டினாலே தண்ணீர் கிடைக்கும் காலம் போய், இரு மாநிலங்கள் தண்ணீருக்காக அடித்துக் கொள்ளும் நிலைமை ஏற்பட்டுவிட்டது.

தண்ணீரை அடிப்படையாக வைத்தே, மின்சாரம், விவசாயம், அடிப்படை பணிகள், அன்றாட வாழ்க்கை என எல்லாம் இயங்குகிறது.

ஒரு பக்கம் மழை வெள்ளம் காரணமாக பேரழிவு ஏற்பட்டாலும், அந்த நீரால் மக்களுக்கு எந்த நன்மையும் வாய்ப்பதில்லை. மற்றொரு பக்கம் கடும் வறட்சி காரணமாக மக்கள் பசியிலும், பஞ்சத்திலும் அடிபட்டு உயிரிழக்கின்றனர்.

வெப்பம் அதிகரித்து வரும் நிலையில், பூமியின் நீர் மட்டம் குறைந்து கொண்டே போகிறது. நீர் நிலைகளை எல்லாம் அழித்துவிட்டு வீடுகளைக் கட்டி குடியேறிவிட்டு, மழைக் காலங்களில் தண்ணீர் தேங்குகிறது என்றும், கோடை காலத்தில் அரசு தண்ணீர் தர வில்லை என்றும் குடத்தை தூக்கிக் கொண்டு அலைகிறோம்.

மனித வாழ்வின் அடிப்படையாக அமைந்து விட்ட தண்ணீரை இதுவரை நாம் எப்படி வேண்டுமானாலும் பயன்படுத்தியிருக்கலாம். அது முடிந்த கதை, இனி மிகவும் சிக்கனமாக பயன்படுத்தினால் தான் நமக்கும், நமது எதிர்கால சந்ததிகளுக்கும் நல்லது.

பூமியில் 71% நீரினால் சூழப்பட்டிருக்கும் போது தண்ணீரைப் பற்றி பேச என்ன இருக்கிறது என்று கேட்கலாம். ஆனால், பூமியில் இருக்கும் நூறு சதவீத தண்ணீரில் 96.5 சதவீத நீர் கடலில் உப்பு நீராகவே உள்ளது.

இதில் 1.7 சதவீதம் நிலத்தடி நீராகவும், 1.7% பனி மலைகளாகவும் உள்ளது. மேலும் 0.001 சதவீத நீர் காற்றிலும், மேகத்திலும் உள்ளது. ஆக மொத்தம், பூமியில் இருக்கும் தண்ணீரில் 2.5% மட்டுமே மக்கள் பயன்படுத்தும் தண்ணீராக உள்ளது.

அதிலும், சுற்றுச்சூழல் மாசு காரணமாகவும், தொழிற்சாலை கழிவுகளாலும் சுத்தமான நீர் மாசடைந்து மக்கள் குடிப்பதற்கு பயன்படுத்த முடியாத நிலையில் உள்ளது. இதனால், உலகில் சுமார் 100 கோடி பேர் சுத்தமான குடிநீர் கிடைக்காமல் தவிக்கின்றனர்.

இந்த நிலையில், எதிர்காலத்தில் குடிநீர் தட்டுப்பாடு இன்னும் அதிகரிக்கும் என்றும், தற்போதைய தேவையை விட 50 சதவீதம் கூடுதலாக தண்ணீர் தேவை உயரும் என்றும், எனவே உலக நாடுகள் அதற்கேற்ப ஏற்பாடுகளை செய்ய வேண்டியது மிகவும் அவசியம் என்று பல ஆய்வுகள் எச்சரிக்கை விடுத்துள்ளன.

எனவே, குடிநீர் மற்றும் வீட்டின் மற்ற தேவைகளுக்குப் பயன்படுத்தும் தண்ணீரை மிகவும் சிக்கனமாக செலவிடுங்கள். எதிர்காலத்துக்கும் கொஞ்சம் விட்டு வையுங்கள்.

By Vanisri Sivakumar
dinamani

by mohaideen Fri Mar 21, 2014 12:48 pm

அவசியமான தகவல்கள்

by sreemuky Fri Mar 21, 2014 8:47 pm

சிறுவயதில் அம்மா தண்ணீரை செலவழித்தால் காசு செலவழியும் என்று சொல்வார்கள். சிக்கனமாக இருக்க அவர்கள் சொன்ன அறிவுரை இது. ஒண்ணொண்ணா நூறா ஒருமிக்க நூறா என்பார்கள். நம் வீடு பெரியவர்களின் தீர்க்க தரிசனத்தை இது காட்டுகிறது.