இலங்கை பொருட்கள் மீதான வர்த்தகச் சலுகைகளை நிறுத்தியது ஐரோப்பிய ஒன்றியம்!

இலங்கையில் தமிழர்களுக்கு எதிரான போரின் இறுதிக் கட்டத்தில் நடந்த போர் குற்றங்கள் குறித்து விசாரணை நடத்த வேண்டும் என்ற கோரிக்கையை இலங்கை அரசு ஏற்க மறுத்ததை அடுத்து அந்நாட்டில் இருந்து இறக்குமதியாகும் பொருட்களுக்கு வழங்கிவந்த வர்த்தகச் சலுகையை ஐரோப்பிய ஒன்றியம் நிறுத்திவிட்டது.

இலங்கையில் இருந்து இறக்குமதியாகி ஐரோப்பியச் சந்தையில் விற்கப்படும் பொருட்களுக்கு ஜி.எஸ்.பி. என்றழைக்கப்படும் வர்த்தகச் சலுகையை ஐரோப்பிய ஒன்றியம் வழங்கிவந்தது.

இதன்படி, இலங்கையில் இருந்து இறக்குமதியாகும் பொருட்கள் மீது விதிக்கப்படும் இறக்குமதித் தீர்வைகளுக்கு ஐரோப்பிய ஒன்றியம் மானியமாக அளித்துவிடும். இதனால் இலங்கைப் பொருட்கள் ஐரோப்பிய சந்தையில் குறைந்த விலையில் விற்கும் வாய்ப்பு கிடைத்தது. இலங்கையைப் பொறுத்தவரை ஐரோப்பிய ஒன்றியத்திற்கு செய்யப்படும் ஏற்றுமதி அளவு ஆண்டிற்கு 3.7 பில்லியன் டாலர்களாகும். இது இலங்கையின் மொத்த ஏற்றுமதியில் 20 விழுக்காடாகும். இந்த ஏற்றுமதியை இன்று முதல் அந்நாடு இழக்கிறது.

இதனால் அந்த நாட்டின் நிறுவனங்களுக்கு, பொதுவாக ஆயத்த ஆடை ஏற்றுமதி செய்யும் நிறுவனங்களுக்கு, பெரும் இழப்பு ஏற்படும் என்று தெரியவந்துள்ளது. இலங்கையின் ஏற்றுமதி நிறுவனங்கள் ஆண்டொன்றுக்கு பெறும் 3 பில்லியன் இலாபத்தில் 500 மில்லியன் இழப்பு, அதாவது 6இல் ஒரு பங்கு இழப்பு ஏற்படும் என்று அந்நாட்டு ஏற்றுமதி வர்த்தக அமைப்பு கூறியுள்ளது.

ஏற்கனவே அமெரிக்காவிற்கு ஏற்றுமதி செய்யப்படும் பொருட்கள் மிகக் குறைந்த இலாப அளவுடன்தான் நடைபெறுகிறது என்றும், இந்த நிலையில் ஐரோப்பிய ஒன்றியத்தின் தடையால் ஆயத்த ஆடைகள் ஏற்றுமதி பெரும் பாதிப்பிற்குள்ளாகும் என்று கூறப்படுகிறது