தமிழ்நாட்டில் கம்பி இழை பல்புகளுக்கு தடை

தமிழக அரசு அலுவலகங்களிலும், உள்ளாட்சி அமைப்புகளிலும் கம்பி இழை மின்சார பல்புகளுக்கு தடை விதிக்கப்பட்டுள்ளது.

மின்சார சக்தியை சிக்கனப்படுத்துவதற்கு இந்த நடவடிக்கை மேற்கொள்ளப்பட்டிருப்பதாக இதற்கென வெளியிடப்பட்ட அரசு ஆணை தெரிவிக்கிறது.

இந்த ஆணையின்படி, அனைத்து அரசுத் துறை அலுவலகங்கள், மாநில பொதுத் துறை நிறுவனங்கள், பல்வேறு வாரியங்கள், கூட்டுறவு நிறுவனங்கள், உள்ளாட்சி அமைப்புகள் மற்றும் அரசு உதவிபெறும் நிறுவனங்களில் கம்பி இழை பல்புகள் பயன்படுத்த தடை செய்யப்பட்டுள்ளது.

40 முதல் 60 வாட் வரை திறன் கொண்ட கம்பி இழை பல்புகள் தரும் அதே ஒளியை, 14 வாட் திறனுள்ள கையடக்க ஒளி உமிழ் விளக்குகள் (CFL) தருவதாக மாநில எரிசக்தித் துறை முதன்மைச் செயலர் பி டபிள்யூ சி தாவிதார் வெளியிட்டுள்ள செய்திக் குறிப்பு தெரிவிக்கிறது.
சிஎஃப்எல் பல்புகள் பயன்பாடு அதிகரித்தால் மின்சாரம் சிக்கனமாக பயன்படுத்தப்படும் என்றும், இந்த விஷயம் குறித்து அரசு முழுமையாக ஆராய்ந்து மின்சக்தி சிக்கனத்திற்கு என இந்த ஆணையை பிறப்பித்திருப்பதாகவும் அவர் குறிப்பிட்டுள்ளார்.

நான்கு கோடி கம்பி இழை மின்சார பல்புகள் ஒரு மணிநேரத்தில் 2,400 மெகாவாட் மின்சாரத்தை பயன்படுத்தும் என்றும், அதே சமயம் அதே எண்ணிக்கையிலான சிஎஃப்எல் பல்புகள் ஒரு மணிநேரத்தில், வெறும் 560 மெகாவாட் மின்சக்தியே பயன்படுத்துவதாக கணக்கிடப்பட்டுள்ளது என்றும் அவர் குறிப்பிட்டுள்ளார்.

அப்போ தமிழ் நாடு இரவைக்கு பால் வெளிச்சமாகிடும்