படப்பிடிப்பில் விபத்து: கடலில் மூழ்கினார் சாந்தனு

இயக்குனர் பாக்யராஜின் மகனும் நடிகருமான சாந்தனு நடிக்கும் படம் ‘கண்டேன்’.

இந்தப் படத்தின் படப்பிடிப்பு, சென்னை கிழக்கு கடற்கரை சாலையில் உள்ள ரிசார்ட் ஒன்றில் நேற்று நடந்தது. வில்லன் கூல் சுரேஷை, சாந்தனு கடலுக்குள் அடித்து இழுத்துச் செல்வது போல காட்சி படமாக்கப்பட வேண்டும். இரண்டு முறை ஒத்திகை பார்த்தனர். அடுத்து டேக் எடுக்கும்போது ராட்சத அலை ஒன்று வேகமாக வந்து சாந்தனுவை கடலுக்குள் இழுத்து சென்றது.

இதை பார்த்த படக்குழுவினர் அதிர்ச்சி அடைந்தனர். உடனே, வில்லன் நடிகர் கூல் சுரேஷ் மற்றும் படக்குழுவினர் நீந்திச் சென்று சாந்தனுவை கரைக்கு இழுத்து வந்தனர். அப்போது அவருக்கு பேச்சு, மூச்சு எதுவும் இல்லை. பதற்றமடைந்த படக்குழுவினர் உடனடியாக அவரை சென்னையிலுள்ள தனியார் மருத்துவமனை ஒன்றில் சேர்த்தனர். அங்கு அவருக்கு தீவிர சிகிச்சை அளிக்கப்பட்டது. இந்த சம்பவத்தால் படப்பிடிப்பு ரத்து செய்யப்பட்டது.

இதுபற்றி நடிகர் சாந்தனுவிடம் கேட்டபோது, “சம்பவம் நடந்தது உண்மைதான். இப்போது நலமாக இருக்கிறேன்”’ என்றார்.

ok