தேர்தலுக்குப் பிறகு தி.மு.க ஆட்சி இல்லை: விஜயகாந்த்

''வரும் சட்டப் பேரவைத் தேர்தலுக்குப் பின் திமுக ஆட்சி இருக்காது'' எ‌ன்று தே.மு.தி.க. தலைவர் விஜயகாந்த் தெ‌ரி‌வி‌த்து‌ள்ளா‌ர்.

விழுப்புரம் மாவட்டம் திண்டிவன‌‌ம் தே.மு.தி.க. நகரச் செயலர் திருமண ‌விழா‌வி‌ல் கல‌ந்து கொ‌ண்டு ‌விஜயகா‌ந்‌த் பேசுகை‌யி‌ல், ''மணமக்கள் ஒருவருக்கொருவர் விட்டுக்கொடுக்கும் மனப்பான்மையுடன் வாழ வேண்டும். ஆண் தவறு செய்தால் பெண் விட்டு கொடுக்க வேண்டும், பெண் தவறு செய்தால் ஆண் விட்டு கொடுக்க வேண்டும். இருவருக்குள் மனஸ்தாபம் இருக்க கூடாது. நானும், எனது மனைவியும் சந்தோஷமாக இருக்க விட்டுக்கொடுத்து வாழ்வதுதான் முக்கிய காரணம்.

விருத்தகிரி படப்பிடிப்பிற்காக முதலில் பாங்காக் சென்றேன். பின்னர் மலேசியாவில் கடந்த ஒ‌ன்றரை மாதமாக படப்பிடிப்பு நடந்தது. படம் எடுக்க ஆரம்பித்து ஓராண்டு ஆகி, முடியும் தருவாயில் உள்ளது. இதற்கிடையில் அரசியல்வாதிகள் ஏதேதோ பேசியதற்கு பதில் சொல்லும் வாய்ப்பு இந்த திண்டிவனம் கூட்டத்தில் அமைந்து விட்டது.

எம்.ஜி.ஆர். ஆட்சிக்கு பின் வந்தவர்கள் மக்களை ஏமாற்றுகிறார்கள். இவர்கள் எந்த வகையில் மக்களுக்கு நன்மை செய்கிறார்கள். கேட்டால் இலவச டி.வி. கியாஸ் அடுப்பு, ரூ.1க்கு அரிசி வழங்குவதாக கூறுகிறார்கள். அண்ணா ஆட்சியமைக்கும்போது ரூபாய்க்கு ஒரு படி அரிசி வழங்குவதாக கூறினார். நீங்கள் 40 ஆண்டுகளுக்கு பின் ஒரு ரூபாய் அரிசி திட்டத்தை அறிவித்துள்ளீர்கள்.

இன்று தமிழ்நாட்டில் 62 லட்சம் இளைஞர்கள் வேலைவாய்ப்பு அலுவலகத்தில் பதிவு செய்து வேலைக்காக காத்திருக்கின்றார்கள். ஆனால் தனது ஆட்சியில் 4.5 லட்சம் இளைஞர்களுக்கு வேலை கொடுத்துள்ளதாக கருணா‌நி‌தி கூறுகிறார். இளைஞர்களுக்கு வேலைகொடுக்கும் எந்த திட்டத்தையாவது கருணா‌நி‌தி வைத்துள்ளாரா? என்னை கண்டு பயப்படுகிறார்கள்.

நான் உங்களிடம் கூட்டணி சேர தூது விட்டேனா?, நான் கூட்டணி குறித்தே பேசவில்லை. நான் உழைத்து சம்பாதிக்கிறேன். வள்ளல், கொடைவள்ளல் என்ற பட்டம் புரட்சி தலைவர் எம்.ஜி.ஆர்.க்கு மட்டுமே சேரும். ராமதா‌சின் கூட்டணி வேண்டாமென்றால் அவர் அறிமுகப்படுத்திய மஞ்சள் துண்டை பயன்படுத்துவது ஏன்? கருணா‌நி‌தி‌யின் பொன் விழாவுக்குப் பின்புதான் அவரது மறுபக்கம் எனக்குத் தெரிந்தது.

தேர்தல் நெருங்குவதையொட்டி 15 லட்சம் விவசாயிகளுக்கு இலவச பம்ப் செட்டு தருவதாக கருணா‌நி‌தி கூறுகிறார். அதுவும் இப்போதல்ல 5 வருடத்தில் தருவதாக கூறுகிறார். தேர்தல் வருவதால் மக்களை ஏமாற்றுகிறார்கள்.

விஜயகாந்த் கட்சியெல்லாம் ஒரு கட்சியா? அவர் குழப்பவாதி என்கிறார்கள். தி.மு.க., அ.தி.மு.க. கட்சியுடன் கூட்டணி வைத்தால்தான் நல்ல கட்சியா?. முடியாது என்ற வார்த்தை முட்டாளுக்கு சொந்தமானது. மக்களுக்கு நல்ல ஆட்சி, இளைஞர்களுக்கு நல்ல கல்வி, வேலை கொடுக்க வேண்டும் என்பதுதான் எனது லட்சியம்.

விஜயகாந்தால் ஊழலை ஒழித்து விடமுடியுமா? என்று கேட்கிறார்கள். ஏன் முடியாது. 30 பேரை எம்.எல்.ஏ. ஆக்கவும், 10 பேரை எம்.பி. ஆக்கவும் நான் கட்சி நடத்தவில்லை. ஏழைகளுக்காக கட்சி நடத்துகிறேன். மக்கள் விரும்புகிற நல்ல கட்சியுடன்தான் கூட்டணி அமைப்போம். அனைவருக்கும் விடிவு காலம் வரும். ஏன், நான் தனியாக ஆட்சி அமைக்க முடியாதா? நான் இருக்கிறேன். என்றும் உங்களை கைவிட மாட்டேன். எம்.ஜி.ஆருக்கு பிறகு யாரும் நல்லாட்சி தரவில்லை. ஆட்சியை என்னிடம் கொடுங்கள். நான் நல்ல ஆட்சியைத் தருவேன். அடுத்த தேர்தலில் தி.மு.க ஆட்சியைப் பிடிக்காது'' எ‌ன்று ‌விஜயகா‌ந்‌த் பே‌சினா‌ர்.