ஒவ்வொரு மாநாட்டிற்கும் 900 ரூபாய்க்கு எங்கே போவது? - அண்ணாவின் அதிர்ச்சி!

நடிகவேள் எம்.ஆர்.ராதாவின் நாடகங்கள் மக்களிடையே பெரும் வரவேற்பைப் பெற்றுக் கொண்டிருந்த காலம். அதை அடிப்படையாக வைத்து அறிஞர் அண்ணா, தந்தை பெரியார் அவர்களை அணுகி, ""நம்முடைய மாநாடுகளிலேயும் ராதாவின் நாடகத்தைப்போடச் சொல்லலாமா?'' என்று கேட்கிறார். பெரியாருக்கு எப்போதும் திரைப்படம், நாடகம் போன்றவற்றில் ஒரு தயக்கம் உண்டு. ஒரு நிமிடச் சிந்தனைக்குப் பிறகு, ""சரி நம்முடைய பகுத்தறிவுக் கருத்துக்களைத்தானே அவர் சொல்கிறார், போடலாம்'' என்று சொல்லிவிட்டு, பெரியார் அடுத்ததாக ஒரு வார்த்தை சொல்லுகிறார். ""என்ன ராதா ஒரு நாடகத்திற்கு நூறு ரூபாய் கேட்பார்...அவ்வளவுதானே'' என்கிறார்.

அண்ணாவுக்குத் தெரியும் அப்போது ராதா ஒரு நாடகத்திற்கு ஆயிரம் ரூபாய் வாங்கிக் கொண்டு இருந்தார் என்பது. ஆனால் ஆயிரம் ரூபாய் என்று சொன்னால் அய்யா அதற்குச் சம்மதிக்க மாட்டார், சரி எப்படியாவது அய்யாவிடத்தில் முதலில் ஒப்புதல் வாங்கிவிடலாம். நூறு ரூபாய் அய்யா கொடுப்பார். மீதி 900 ரூபாயை எப்படியாவது சமாளித்து, மாநாட்டு வரவிலிருந்தாவது கொடுத்துவிடலாம் என்ற முடிவோடு அண்ணா அதை ஏற்றுக்கொள்ள, ராதாவின் நாடகம் முதன்முதலாக சுயமரியாதை மாநாட்டிலே நடைபெற்றது. பெரும் வரவேற்பு. அதைப் பார்த்துவிட்டு அய்யாவும் மகிழ்ச்சியாகச் சொல்லுகிறார்,""நாம் நூறு கூட்டங்களில் பேசுவதன் மூலம் சாதிப்பதை, ராதா ஒரு நாடகத்தின் மூலம் சாதித்துவிடுகிறாரே, மிக நன்றாக இருக்கிறது. வெறும் நூறு ரூபாய்தானே...இனி எல்லா மாநாடுகளிலும் ராதாவின் நாடகத்தைப் போடுங்கள்''என்று சொன்னபோது அண்ணா அதிர்ந்து போய்விடுகிறார்!

இனி ஒவ்வொரு மாநாட்டிற்கும் 900 ரூபாய்க்கு எங்கே போவது? இப்படிப் பல சுவையான நிகழ்ச்சிகளை உள்ளடக்கி வந்துள்ள புத்தகம்தான் பெரியார் ஒரு தீவிரவாதி என்பது. வழக்கறிஞர் ஆ.முத்து நாராயணன் தான் நேரடியாகவும், பிறர் மூலமாகவும் அறிந்த பல சுவையான செய்திகளை அந்த நூலில் தொடுத்திருக்கிறார்.

("ஒன்றே சொல்! நன்றே சொல்! (தொகுதி 4)' என்ற நூலில் ஆசிரியர் சுப.வீரபாண்டியன்) நன்றி-தினமணி

பதிவிற்கு நன்றி