வெளிநாட்டுப் பயணக் காப்பீடு பற்றித் தெரியுமா?

காப்பீடு பற்றி நன்கு அறிந்தவர்கள் கூட 'ஓவர்சீஸ் இன்சூரன்ஸ் பாலிசி' எனப்படும் வெளிநாட்டுப் பயணக் காப்பீடு பற்றி அறியாமல் இருக்கிறார்கள். வெளிநாடுகளுக்குப் பயணம் மேற்கொள்வோர், 'ஓவர்சீஸ் இன்சூரன்ஸ் பாலிசி'யை எடுத்துக்கொள்வதே முழுப் பாதுகாப்பு.

இந்த பாலிசிகளை ஒருநாள் தொடங்கி தேவைக்கு ஏற்ப அதிகபட்சமாக 180 நாட்கள் வரை செல்லும்படியாக எடுத்துக்கொள்ளலாம். இந்த பாலிசியின் மூலம், வெளிநாட்டுப் பயணத்தின் போது திடீர் விபத்தால் உண்டாகும் மருத்துவச் செலவுகள், பாஸ்போர்ட் காணாமல் போவது, விமான தாமதத்தால் பயணம் தள்ளிப் போவது, லக்கேஜ் காணாமல் போவது, விமானம் கடத்தப்படுவது போன்ற விரும்பத்தகாத சூழல்களில் ஏற்படும் பாதிப்புகளுக்கு இழப்பீடு பெறலாம்.

சுற்றுலா செல்லும் நாடு, பயண நாட்களைப் பொறுத்து பிரீமியத் தொகை இருக்கும். தீவிரவாத அச்சுறுத்தல்கள், இயற்கைப் பேரழிவுகள் அடிக்கடி ஏற்படும் நாடுகளுக்கு என்றால் பிரீமியத் தொகை அதிகமாக இருக்கும். 35 வயதுள்ளவருக்கு 1 லட்சம் அமெரிக்க டாலர்களுக்கு பாலிசி (30 நாட்கள்) எடுப்பதாக இருந்தால் அதற்கு பிரீமியம் 2 ஆயிரத்து 500 ரூபாய் முதல் 3 ஆயிரம் ரூபாய் வரை இருக்கும்.

சாதாரணமாக, ஒரு வயது முதல் 70 வயதுள்ளவர்களுக்கு இந்த இன்சூரன்ஸ் எடுத்துக்கொள்ளும் வசதி இருக்கிறது. 70 முதல் 85 வயது என்றால் பாலிசிக்கு கூடுதல் பிரீமியம் கட்ட வேண்டும். பாலிசி எடுக்க பாஸ்போர்ட், விசா சான்று கொடுத்தால் போதும். நிம்மதியாக இருந்தால்தான் வெளிநாட்டுப் பயணம் இனிமையானதாக அமையும்.

அறியதந்தமைக்கு நன்றி அண்ணா.