புத்திசாலி சிறுவன்!

by மகா பிரபு Mon Mar 03, 2014 8:54 am

அன்று அரசவைக்கு அமைச்சர் தன் பதினொரு வயது மகனையும் உடன் அழைத்து வந்தார். அச்சிறுவன் மன்னனை வணங்கிய விதம் அவரைக் கவர்ந்தது.

பின்னர் வழக்கமான கேள்விகள் கேட்கப்பட்டன. அனைவரும் பதிலளித்தனர்.

திடீரென மன்னர், தன்னை வணங்கிய சிறுவனைச் சோதிக்க விரும்பி, அவனுக்குப் பிடித்த பறவைகளைப் பற்றிய ஒரு கேள்வியை முன்வைத்தார்.

அவர் அமைச்சர்களைப் பார்த்து, "நம் நாட்டில் உள்ள மொத்த கொக்குகள் எத்தனை?'
என்று கேட்டார். மன்னர் கேட்ட மற்ற கேள்விகளுக்கெல்லாம் சரியாகப் பதிலளித்த அமைச்சர்கள் விழித்தனர்.

மன்னர் அச்சிறுவனைப் பார்த்து, "உனக்குத் தெரியுமா?' எனக் கேட்டார்.

சிறுவன் மன்னரைப் பணிவுடன் வணங்கிவிட்டு, "ஆறு லட்சத்து 68 ஆயிரத்து 220 கொக்குகள்' என்றான்.

அமைச்சர் முதற்கொண்டு மன்னருக்கும் அதிர்ச்சி! இருந்தாலும் மன்னர் விடாப்பிடியாக, "நீ கூறியதைவிட அதிக அளவில் இருந்தால் என்ன செய்வது?' என்று கேட்டார்.

"மன்னர் பெருமானே, தாங்கள் கூறுவது உண்மையாகக்கூட இருக்கலாம். ஏனெனில் நான் கூறிய எண்ணிக்கையைவிடக் கூடுதலாக இருந்தால், வெளிநாட்டிலிருந்து நமது நாட்டிற்கு சில கொக்குகள் விருந்தாளிகளாக வந்துள்ளன எனத் தெரிந்து கொள்ளலாம்' என்றான் அச்சிறுவன்.

மீண்டும் மன்னர், "ஒருவேளை குறைவாக இருந்தால்?' என்று கேட்டார்.

"அப்படியும் இருக்கலாம். நமது நாட்டிலிருந்து அவை வெளிநாட்டிலுள்ள உறவுக்கார கொக்குகளைப் பார்க்கச் சென்றிருக்கும்' என்றான் அந்தச் சிறுவன்.

மன்னர் அவனது சமயோசித அறிவினைப் பாராட்டிப் பரிசுகள் வழங்கினார்.

-டி. ஜானகிராமன்