வெளிநாட்டில் எம்.பி.ஏ., படிக்க விரும்புவோர் கவனிக்க...

எம்.பி.ஏ., சேர்க்கை நடைமுறைகள், உள்நாட்டிலும், வெளிநாட்டிலும் பெருமளவு மாறுபடுகின்றன. நீங்கள் எழுத வேண்டிய நுழைவுத் தேர்வு, தேர்ந்தெடுத்த கல்வி நிறுவனத்தின் தரம் மற்றும் அங்கீகாரம் உள்ளிட்ட விஷயங்களை கவனமாக ஆய்வுசெய்ய வேண்டியுள்ளது.

ஒரு மாணவர், தன் ஆற்றல், திறன், ஆர்வம் மற்றும் மாறிக்கொள்ளும் தன்மை(adaptability) ஆகியவற்றின் அடிப்படையில், வெளிநாட்டு எம்.பி.ஏ., படிப்பிற்கான முடிவை மேற்கொள்ள வேண்டும். மேலும், எந்தத் துறையில், என்ன மாதிரியான நிறுவனத்தில், எதிர்காலத்தில் பணியாற்ற போகிறோம் என்பதிலும் மாணவர்களுக்கு தெளிவிருக்க வேண்டும்.

வெறுமனே, ஒரு சுமாரான வெளிநாட்டுப் பல்கலைக்கழகத்தில் MBA பட்டம் வாங்கிவிட்டால் மட்டுமே, ஒருவர் இந்தியாவில் பெரிய பணி வாய்ப்புகளைப் பெற்றுவிடுவார் என்று கூறிவிட முடியாது. இந்தியாவில் உள்ள சிறந்த வணிகப் பள்ளிகளில் படித்த மாணவர்களே, இந்தியப் பணிகளுக்கு விரும்பி தேர்வு செய்யப்படுகிறார்கள்.

சில மாணவர்களுக்கு, வெளிநாட்டில் எம்.பி.ஏ., படிப்பது ஒரு சாதனையாக தெரியலாம். ஆனால், இன்றைய பொருளாதார மந்த நிலையில், அவர்களால் மேற்கத்திய நாடுகளில் சிறப்பான பணி வாய்ப்புகளைப் பெற முடிவதில்லை. எனவே, அவர்கள் இந்தியாவில் பணி வாய்ப்புகளைத் தேடுகையில், அவர்களுக்கான முக்கியத்துவம் கிடைப்பதில்லை.

எனவே, முக்கியத்துவமற்ற வெளிநாட்டு பல்கலைகளில் எம்.பி.ஏ., முடிக்கும் மாணவர்கள், வெளிநாடுகளிலும், இந்தியாவிலும் சரியான பணி வாய்ப்புகளைப்பெற முடியாமல், காலமும், பணமும் வீணாகிவிட்டதை நினைத்து வருந்தும் நிலை ஏற்படும்.

வெளிநாட்டில் ஒரு சுமாரான பல்கலையில் MBA படிப்பது குறித்து முடிவு எடுக்கையில், நிதி நிலையும், பணி லட்சியமும் முக்கிய பங்கு வகிக்கின்றன. பொதுவாக, இந்திய MBA படிப்பைவிட, வெளிநாட்டு எம்.பி.ஏ., படிப்பு செலவு கூடுதலான ஒன்றாகும். எனவே, உங்களின் தொழில் லட்சியம் குறித்த தெளிவான பார்வையைக் கொண்டிருக்க வேண்டும்.

பொதுவாக, ஒரு வெளிநாட்டு பல்கலையில் எம்.பி.ஏ., முடித்தவர்கள், குறைந்தபட்சம் 5 அல்லது 6 ஆண்டுகள் வெளிநாடுகளில் பணி புரிந்து, அந்த அனுபவத்தைப் பெற்றால்தான், அவர்களின் வெளிநாட்டு MBA பட்டத்திற்கு மவுசு அதிகரிக்கும். அதேசமயம், இந்திய வணிக சந்தை தொடர்பான விஷயங்களில் நீங்கள் ஸ்பெஷலைசேஷன் மேற்கொள்ள விரும்பினால், இந்தியாவில் MBA படிப்பதே சிறந்தது.

வெளிநாட்டு எம்.பி.ஏ., மோகத்திலுள்ள மாணவர்களுக்கு இப்போது வேறுசில புதிய வாய்ப்புகளும் இருக்கின்றன. எனவே அதைப்பற்றி கட்டாயம் தெரிந்துகொள்ள வேண்டும். Schulich School of Business என்ற வெளிநாட்டு கல்வி நிறுவனத்தின் வளாகம் ஐதராபாத்திலும், SDA Bocconi என்ற கல்வி நிறுவன வளாகம் மும்பையிலும் இருக்கின்றன.

எனவே, உள்நாட்டிலேயே, அதிக செலவின்றி, சர்வதேச எம்.பி.ஏ., பாடத்திட்டத்தை படித்ததன் திருப்தியை இந்திய மாணவர்கள் பெற்றுக்கொள்ளலாம். எனவே, எப்படியாவது வெளிநாட்டு MBA படித்தால் போதும் என்று நினைத்து, அவசரப்பட்டு முடிவெடுத்து, பணத்தையும், காலத்தையும் விரயம் செய்வதை தவிர்த்திடுவீர்.

சிறப்பான பதிவு அனைவரும் தெரிந்து கொள்ள வேண்டிய ஒன்று