திரும்ப கண்டுபிடிக்கப்பட்ட விநாயகர் ஆலயம் திருச்சியில் பரபரப்பு

திருச்சி: திருவானைக்காவலில், 20 ஆண்டுக்கு மேல் தனிநபரால், மறைக்கப்பட்ட
விநாயகர் கோவில், விநாயகர் சதுர்த்தியன்று மீட்கப்பட்ட சம்பவம், பக்தர்களை
மகிழ்ச்சியில் ஆழ்த்தியுள்ளது. பஞ்ச பூத ஸ்தலங்களில், நீர் ஸ்தலமாகக்
கருதப்படுவது, திருச்சி திருவானைக்காவல் அகிலாண்டேஸ்வரி ஜெம்புகேஸ்வரர்
கோவில். 1,000 ஆண்டுகளுக்கு முன், செங்கோட்சோழனால் கட்டப்பட்ட திருத்தலம்
இது. கிழக்கு நோக்கிய சுந்தர பாண்டியன் ராஜகோபுரம், மேற்கு நோக்கிய
குலோத்துங்க சோழன் ராஜகோபுரம் உட்பட, ஐந்து கோபுரங்கள், நீண்ட, அழகிய,
ஐந்து பிரகாரங்களைக் கொண்ட சிறப்புக்குரியது. கோவிலின், ஐந்தாவது
பிரகாரத்தின் தென் மேற்கில், பசுபதி விநாயகர், தென் கிழக்கில், நன்று தரும்
விநாயகர், வடமேற்கில், செங்கணி விநாயகர், வடகிழக்கில், திருநீலகண்ட
விநாயகர் சன்னிதி என, பிரகாரத்தின் ஒவ்வொரு மூலையிலும் விநாயகர் சன்னிதிகள்
உள்ளன. கோவிலின், நான்காவது பிரகாரத்தின், தென்மேற்கில், சித்தி விநாயகர்,
தென்கிழக்கில், ஆனந்த விநாயகர், வடகிழக்கில், ஈசான்ய விநாயகர் என, மூன்று
மூலைகளில் விநாயகர் சன்னிதிகள் உள்ளன. வடமேற்கில் இருக்க வேண்டிய விநாயகர்
சன்னிதி மட்டும் காணவில்லை.
கடந்த, 20 ஆண்டுக்கு மேலாக மறைந்திருந்த,
வடமேற்கு பகுதி விநாயகர் சன்னிதியை கண்டறிய, சிவனடியார்களும், சில தன்னார்வ
தொண்டர்களும், ஒரு மாதமாக தீவிர முயற்சிகள் மேற்கொண்டனர். திருவானைக்காவல்
இந்து சமய அறநிலையத்துறை அதிகாரிகளிடம் புகார் அளித்தனர். அதன் விளைவாக,
தி.மு.க., பிரமுகரான அர்ஜுனன் என்பவர் மகன் தனபால், கோவிலை மறைத்து
வைத்திருந்த, "ஆஸ்பெஸ்டாஸ் ஷீட்'டை, அதிகாரிகள் அகற்றினர்.
கோவிலின்
அருகே கட்டப்பட்டிருந்த கழிவறையை இடித்தனர். வடமேற்கில் இருந்து, "மீண்டு'
வந்துள்ள விநாயகர், "அகஸ்திய' விநாயகர் என, சில சிவனடியார்கள்
தெரிவித்தனர். "கோவில் பாதையை ஆக்கிரமித்து, தனபால் கட்டியுள்ள மாடிப்படி
மற்றும் கோவில் பின்புறம் உள்ள ஆக்கிரமிப்புகளை உடனடியாக அகற்ற வேண்டும்'
என்று திருவானைக்காவல் அதிகாரிகளுக்கு, சிவனடியார்கள் கோரிக்கை
விடுத்துள்ளனர். கடந்த, 20 ஆண்டுகளாக உரிய பராமரிப்பின்றி, பூஜை,
புனஸ்காரங்கள் இன்றி கிடந்த, விநாயகர் சன்னிதி நேற்று முன்தினம்
சுத்தப்படுத்தப்பட்டது. விநாயகர் சதுர்த்தி விழா கோலாகலமாக
கொண்டாடப்பட்டது.

இணையம்

வினாயகருக்கே இந்த கதியா?

எப்படியோ வந்துட்டார்..