‘சின்னக் குற்றாலம்’ – கும்பக்கரை

தேனி மாவட்டத்தின் குற்றாலமாகத் திகழ்கிறது, கும்பக்கரை. இங்கு கொட்டும் நீர்வீழ்ச்சி, தென் மாவட்டப் பகுதி மக்களை பெருமளவில் ஈர்த்து வருகிறது.
கும்பல்கரையே கும்பக்கரை என்று மருவியதாகக் கூறப்படுகிறது.

வன தெய்வங்களான மாட்சிநாயக்கன், வீரபுத்திரன், வைரவன், பூதநாட்சி, செழும்புநாட்சி, சோத்துமாயன், சின்ன அண்ணன், கருப்பணசாமி ஆகிய தெய்வங்கள் இங்குள்ள கரையில் கும்பலாகக் கூடுமாம். அதனால் இது கும்பல்கரை என்று முன்னர் அழைக்கப்பட்டதாம்.

இங்கு விழும் நீர்வீழ்ச்சி, கொடைக்கானல் அருகில் உள்ள பாம்பாறு பகுதியில் தோன்றி பாறைகளிடையே பாய்ந்து வந்து கொட்டுகிறது. குளிப்பதற்கும் கண்டுகளிப்பதற்கும் திகட்டாத நீர்வீழ்ச்சி இது.

இந்நீர்வீழ்ச்சிக்கு முன்னாலும், சாலையின் இருபுறங்களிலும் மா, தென்னந்தோப்புகள், பல்வேறு வகை மரங்கள் கண்களுக்குக் குளிர்ச்சியூட்டுகின்றன. மலைப் பகுதியில் நீண்ட தூரம் பயணித்து வருவதால் கும்பக்கரை அருவி நீர், மூலிகை மற்றும் தாதுப் பொருள்களின் நற்குணங்களை அள்ளிக் கொணர்ந்து சேர்க்கிறது.

இந்நீர்வீழ்ச்சியில் தண்ணீர் செல்லும் தடம், வழுக்குப் பாறை, யானைக் கெஜம், உரல் கெஜம், பாம்பு கெஜம் என்று அழைக்கப்படுகிறது. யானைக் கெஜம், உரல் கெஜம் பகுதிகளில் சுற்றுலாப் பயணிகள் நீராடி மகிழ்கின்றனர்.
மழைக் காலத்தில் நீர்வீழ்ச்சியில் விழும் தண்ணீர் அதிகமாகவும், கோடை காலத்தில் குறைவாகவும் இருக்கும். நீரின் வேகம் அதிகமாகும்போது அருவியில் குளிப்பதற்குத் தடை விதிக்கப்படுகிறது.

பெரியகுளத்திலிருந்து 8 கி.மீ. தொலைவில் கொடைக்கானல் அடிவாரத்தில் பள்ளத்தாக்குப் பகுதியில் கும்பக்கரை நீர்வீழ்ச்சி அமைந்துள்ளது. மதுரையிலிருந்து 89 கி.மீ. தொலைவில் உள்ளது. விடுமுறை தினங்களில் கூட்டம் அதிகமாக இருக்கும்.

அருகில் உள்ள மக்கள், ஓர் உள்ளூர் சுற்றுலா போலச் சென்று ஒரு நாளை உல்லாசமாகக் கழிக்க ஏற்ற இடம் கும்பக்கரை.

“உள்ளூர் ‘பிருந்தாவனம் வைகை அணை:

ஆண்டிபட்டியிலிருந்து 7 கி.மீ. தொலைவில் பெரியகுளம் சாலையில் அமைந்துள்ளது வைகை அணை. வைகை ஆற்றின் குறுக்கே இந்த அணை கட்டப்பட்டுள்ளது. 111 அடி உயரமுள்ள இந்த அணையில் 71 அடி வரை நீர் தேக்கிவைக்கப்படுகிறது. இந்த அணையைச் சுற்றி அழகான பூங்கா பராமரிக்கப்பட்டு வருகிறது. “உள்ளூர் பிருந்தாவனம்’ என்று இது அழைக்கப்படுகிறது.

சோத்துப்பாறை அணை: பெரியகுளத்திலிருந்து 12 கி.மீ. தொலைவில் உள்ள இந்த அணை, வராக நதியின் மேல் கட்டப்பட்டுள்ளது. இதுவும் ஓர் அழகான சுற்றுலா மையம்.

சுருளி நீர்வீழ்ச்சி: கம்பத்திலிருந்து சுமார் 10 கி.மீ. தொலைவில் உள்ள இந்நீர்வீழ்ச்சி, மாநிலத்தின் அனைத்து இடங்களிலிருந்தும் சுற்றுலாப் பயணிகளை ஈர்க்கிறது. இங்கு நீர்வீழ்ச்சி இரண்டு கட்டமாக விழுகிறது. காட்டுக்குள் இருக்கும் இந்நீர்வீழ்ச்சியில் ஆண்களும் பெண்களும் தனித்தனியே நீராடுவதற்கு வசதி உள்ளது.

மாவூத்து வேலப்பர் கோயில்: இயற்கை எழில்கொஞ்சும் வருசநாடு மலைத் தொடரில் இக்கோயில் அமைந்துள்ளது. மழைக் காலத்தில் மாமர வேர்களில் நீர் தேங்கி பின்னர் ஊற்றாக பிரவகிப்பதால் இது மாவூத்து என்று பெயர் பெற்றது எனக் கூறப்படுகிறது

இந்த ஊற்று நீரில் சமைத்துச் சாப்பிட்டால் தீராத நோயும் தீரும் என்பது நம்பிக்கை.

மேகமலை நீர்வீழ்ச்சி: தேனியிலிருந்து 54 கி.மீ. தொலைவில் கோம்பைத் தொழு கிராமத்துக்கு அருகில் மேகமலை நீர்வீழ்ச்சி உள்ளது. மேகமலைப் பகுதியில் உற்பத்தியாகும் இந்நீர்வீழ்ச்சி, “சின்னச் சுருளி’ என்று அழைக்கப்படுகிறது.


நன்றி: தினமணி - வலைப்பூ

அருமை அருமை