முழு உடல் பரிசோதனை

நமது உடலில் என்னென்ன பாதிப்புகள் இருக்கிறது என்பதை முழுமையாக உணர்ந்துகொள்ள முழு உடல் பரிசோதனை தேவைப்படுகிறது. 30 வயதை கடக்கும்போது மூன்று வருடத்துக்கு ஒரு முறையும், 40 வயதை கடக்கும்போது இரண்டு வருடத்துக்கு ஒரு முறையும், 50 வயதை கடந்து விட்டால் வருடத்திற்கு ஒரு முறையும் முழு உடல் பரிசோதனை செய்ய வேண்டும்.

முழு உடல் பரிசோதனைக்கு நீங்கள் செல்லும்போது உங்களிடம் ஒரு கேள்வித்தாளைக் கொடுத்து, பதில் எழுதச் சொல்வார்கள். அவை பெரும்பாலும் ‘ஆம்’ அல்லது ‘இல்லை’ என்ற வகையாக இருக்கும்.

கண், காது, மூக்கு, தொண்டை, தோல், பசி, தூக்கம், பல், நாக்கு, மார்பு, இதயம், வயிறு, பிறப்பு உறுப்பு நோய்கள், மரத்துப்போதல், வலி, கூச்சம், பெரியதாகும் மச்சம், ஆறாத புண்கள் பற்றிய கேள்விகளாக அவை இருக்கும். நீங்கள் வேகமாக அதற்கு விடையளித்துவிடலாம்.

அந்த பதில்களை வைத்துத்தா உங்கள் உடலில் கூடுதல் கவனம் எதற்கு செலுத்தவேண்டும் என்று நிர்ணயிப்பார்கள். கூடுதல் பரிசோதனைகளும் செய்வார்கள். நீங்கள் சிறு வயதில் போட்டுக்கொண்ட தடுப்பு ஊசி, செய்து கொண்ட அறுவை சிகிச்சைகள்,

ஒத்து கொள்ளாத மருந்துகள், இதற்குமுன் மருத்துவமனையில் அனுமதிக்கப்பட்டிருந்தால் அது பற்றிய விவரங்களை குறிப்பாக எழுதிவைத்து அவர்களிடம் கூறவேண்டியதிருக்கும். பாரம்பரியமாக ஏதாவது நோய்கள் உங்கள் குடும்பத்தில் இருந்தால் அதையும் நினைவுப்படுத்தி வைத்துக்கொள்ளுங்கள்.

பரிசோதனைக்கு முந்தைய நாள் நீங்கள் மனதளவில் தயாராகவேண்டும். எப்படி தெரியுமா? இரவு சாப்பிட்டுவிட்டு நிம்மதியாகக் தூங்கி எழ வேண்டும். காலையில் பல் துலக்கியதும், ஒரு டம்ளர் தண்ணீர் குடியுங்கள். பரிசோதனை முடியும் வரை டீ, காபி, பால், உணவு எதுவும் சாப்பிடக் கூடாது. வெறும் வயிற்றோடுதான் பரிசோதனைக்கு செல்ல வேண்டும்.

பரிசோதனையில் சர்க்கரை, கொலஸ்ட்ரால், நல்ல கொழுப்பு ஹெச்.டீ.எல், கெட்ட கொழுப்பு எல்.டீ.எல் மற்றும் வீ.எல்.டீ.எல், ட்ரைகிளிசரைடு போன்றவற்றை அளவிட வேண்டும். உணவு வயிற்றில் இருந்தால், அளவு மாறி அது வியாதியால் ஏற்பட்ட பாதிப்பா அல்லது சாப்பிட்ட உணவா எனக் குழப்பம் ஏற்பட வாய்ப்பு உண்டு.

இரைப்பைக்குக் கீழே கணையம் இருப்பதால், உணவு இரைப்பையில் இருந்தால் கணையம் தெரியாது. சர்க்கரை நோய்க்குக் கணையத்தில் ஏற்படும் கல், கட்டி, அழற்சி ஆகியவையும் காரணமாக இருக்கலாம். அதனால்தான் வயிறு காலியாக இருக்கவேண்டும் என்று உணர்த்தப்படுகிறது.

வெறும் வயிற்றில் ஒரு டம்ளர் தண்ணீர் குடித்திருந்தால் மட்டுமே வயிற்றின் உள் உறுப்புகளை ஸ்கேன் செய்து பார்க்க முடியும். தண்ணீர் குடித்ததும், சிறுநீர்ப் பையில் சிறுநீர் நிரம்பி இருந்தால் மட்டுமே ஆண்களுக்கு ப்ராஸ்டேட் சுரப்பியில் ஏற்படும் வியாதிகளையும் பெண்களுக்கு கர்ப்பப்பை குறைபாடுகளையும்,

நீர்க்கட்டிகள் புற்றுநோய்க் கட்டிகள் ஆகியவற்றையும் தெளிவாக ஸ்கேன் செய்து பார்க்க முடியும். சிறுநீரகப் பிரச்சினை உள்ளவர்களுக்குச் சிறுநீர் கழித்த பிறகும் உள்ளே சிறுநீர் தேங்கி இருக்கிறதா, எந்த அளவில் அது இருக்கிறது என்பன பற்றி தெரிந்துகொள்ள மீண்டும் ஒரு முறை ஸ்கேன் செய்து பார்ப்பார்கள்.

நன்றி மாலை மலர்

 பயனுள்ள தகவல்,நன்றி அண்ணா