மணவறை முதல் கல்லறை வரை

கொஞ்சம் கற்பனைகளோடும்
மிஞ்சும் ஒப்பனைகளோடும்
மிகையான கனவுகளோடும்
வகையான உணவுகளோடும்
அலங்கரிக்கும் தோரணங்களோடும்
அங்கம் நிறைக்கும் ஆபரணங்களோடும்
பழக்கமான நண்பர்கள் முன் நிற்க
வழக்கமான சொந்தங்கள் பின் நிற்க
திருமணம் எனும் பெயரில் இருமனம் இணைத்து
தீராத ஆசைகளை திகட்டத் தீர்த்து
சில மாதங்களில் கருவுற்று
சீமந்தம் செய்து சிறப்புற்று
பத்து மாதங்களாய் கருவாய் சேமித்து
பத்து நிமிடங்களில் உருவாய் பிரசவித்து-அவள்
தாய் ஆனதோடு இன்றி-தன்
தலைவனையும் தந்தை ஆக்குகிறாள்
அன்றிலிருந்து அவனுள் பொதுநலம் விலகி
என்குடும்பம் எனும் சுயநலம் பழகி
பகலில் அலுவலகத்தில் உழைத்தும்
பின்னிரவில் அவளுடன் கட்டிலில் திளைத்தும்
காலத்தை கழிக்கின்றான்
காமத்திலும் களிக்கின்றான்
அலுவலக உழைப்பு அது காலத்தின் கட்டாயம்
அவளுடன் களிப்பு அது காமத்தின் கட்டாயம்
இங்கனம் சுழன்று கொண்டிருக்கும் அவன் வாழ்விலே
இன்பம் நீங்கி துன்பம் தேங்கி விடுகிறது
பணம் பணம் எனும் பித்துப் பிடித்து
தன் குடும்பத்திற்கு சொத்து சேர்த்து
இறுதியில் தன் குடும்பத்தின் மீதான அக்கறையில் உழைத்தவன்
குருதியில் குடிகொண்டது சக்கரை நோய்
நித்திரையைத் தொலைத்து மாத்திரையைப் புசித்து
காலம் கழித்தவனை அழைக்கலானான் காலன்
அன்று மணக்கோலம் கண்டான் மணவறையில்
இன்றோ பிணக்கோலம் கொண்டான் கல்லறையில்.!!!!