தமிழில் பெயர்பலகை இல்லாத கடைகள் மீது நடவடிக்கை

மதுரை:""மதுரை மாவட்டத்தில் தமிழில் பெயர் பலகை இல்லாத கடைகள் மீது நடவடிக்கை எடுக்கப்படும்,'' என கலெக்டர் காமராஜ் தெரிவித்தார்.இது தொடர்பான ஆலோசனை கூட்டத்தில் அவர் பேசியதாவது:கோவையில் நடைபெறும் செம்மொழி மாநாட்டையொட்டி, தமிழ் உணர்வை மேலும் அதிகப்படுத்தும் வகையில் பேச்சிலும், செயலிலும் முழுமையாக தமிழை பயன்படுத்துவேண்டும்.



நிறுவனங்களின் பெயர் பலகையில் நிறுவனத்தின் பெயர் தமிழிலும், இரண்டாவது ஆங்கிலத்திலும், மூன்றாவது வேறு மொழியில் எழுத வேண்டும். பெயர் பலகைகளில் தமிழுக்கு முக்கியத்துவம் அளிக்கும் வகையில் 1958ம் ஆண்டில் சட்டம் இயற்றப் பட்டுள்ளது. இதனை தொழிலாளர் துறை கண்காணிக்கிறது. இந்த சட்டத்தை மீறுவோர் மீது நடவடிக்கை எடுக்கப்படுகின்றன.



தொழிலாளர் துறையினர் இம்மாதம் நடத்திய ஆய்வில் 178 கடைகள் மீது நடவடிக்கை எடுக்கப்பட்டு 8,750 ரூபாய் அபராதம் விதிக்கப்பட்டுள்ளது. தொடர்ந்து கண்காணிப்பு செய்யப்படும். எனவே கடைகளின் பெயர்களை தமிழில் எழுத வேண்டும், என்றார்.தொழிலாளர் இணை ஆணையர் ஜெயசிங்கன், துணை ஆணையர் ரவிசங்கர், தொழிலாளர் ஆய்வாளர் கோவிந்தன், வர்த்தக சங்க நிர்வாகிகள் பங்கேற்றனர்.