கவலை தேவையா

by நாஞ்சில் குமார் Sun Apr 06, 2014 11:10 pm

குரு மகான் வேதாத்திரி மகரிஷியின் சிந்தனை தொகுப்பிலிருந்து:

கவலை தேவையா

நாம் பல விஷயங்களுக்காக ஏதேனும் ஒன்றைப் பற்றிக் கவலைப்பட்டுக் கொண்டே இருக்கிறோம். கவலைப்படுவதில் 40% நிச்சயம் நடக்காது. எனவே கவலைப்பட வேண்டியதில்லை.

30% கவலைகள் கடந்த காலம் பற்றியவை. நான் இதைப் படித்ததற்கு அதைப் படித்திருக்கலாமே, இங்கே வேலை செய்வதற்குப் பதில் அங்கே போயிருக்கலாமே என்பது போன்று.

12% கவலை வேறு மாதிரியானவை. என்னைப் பார்த்து இவன் இப்படி பேசிவிட்டானே என்பது போன்றவை. இதற்காகவும் கவலைப்பட வேண்டியதில்லை. நம்மைத் திட்டியவர் ஏதோ பிரச்சினையில் இருக்கிறார்.

10% கவலை உடல் நலத்தைப் பற்றியது. முடி கொட்டுகிறது, நீரழிவு நோய் வந்து விட்டதே, ரத்த அழுத்தம் இருக்கிறதே என்று கவலை. இதற்காகக் கவலைப்பட்டால் உடல் நலம் இன்னும் கெடும்.

மீதமுள்ள 8% கவலைகள் உண்மையானவை. இவற்றை நேருக்கு நேர் சந்திக்க வேண்டும் என்றால் அதைப் பற்றி கவலைப் படாமல் இருக்க வேண்டும். அது தான் முக்கியம்.

எந்த ஒரு துன்பத்திலும் நன்மை இருக்கும். ஒருவன் படகில் பயணம் செய்தான். அது உடைந்து விட்டது. ஒரு தீவில் ஒதுங்கினான். ஒரு குடிசை கட்டி வாழ்ந்தான். உணவிற்காக நெடுந்தூரம் சென்ற நேரத்தில் வீடு தீப்பற்றி எரிந்து போயிற்று. கடவுளுக்கு இது கூட பொறுக்க வில்லையே என்று கவலைப் பட்டான். அதிகாலை நேரத்தில் ஒரு கப்பல் வந்தது. புகையைப் பார்த்து வந்தோம், உதவி கேட்பவர்கள் எதையாவது எரித்து அந்த செயல் மூலமாக ஆபத்தைத் தெரிவிப்பார்கள் என்றார் கப்பலின் தலைவர். ஆக எவ்வளவு துன்பம் என்றாலும் அதில் ஒரு நன்மை கண்டிப்பாக உண்டு. இதையே,

“வந்த துன்பம் ஏற்றுச் சகித்து அவற்றைப் போக்க
வழி கண்டு முறையோடு ஆற்றி இன்பம் காத்து
எந்தத் துன்பம் வரினும் எதிர் நோக்கி நிற்பாயேல்
இன்பமே மிகுதி படும், துன்பங்கள் தோல்வியுறும்.
- வேதாத்திரி மகரிஷி.

by ஸ்ரீராம் Mon Apr 07, 2014 12:13 pm

பயனுள்ள தகவலுக்கு நன்றி சூப்பர்

by mohaideen Mon Apr 07, 2014 6:22 pm

ஆறுதலான விஷயம்தான்

ஆனாலும் ஏதாவது ஒருவிதத்தில் கவலை வந்துவிடுகிறதே.

கவலைப்படாமல் இருக்க முயற்சி செய்வோம்

by செந்தில் Mon Apr 07, 2014 9:02 pm

தன்னம்பிக்கை தரும் பகிர்வு.நன்றி கைதட்டல்

by sreemuky Tue Apr 08, 2014 10:13 am

என் நண்பர் ஒருவர் இருக்கிறார். அவருக்கு வாழ்வில் எல்லாம் இருக்கிறது. ஆனாலும் ஒருநாள் கவலையாய் இருந்தார். என்ன விஷயம் என்று கேட்ட பொழுது, ஒருவேளை இந்த நிலைமை நாளை மாறிவிட்டால் என்ன ஆகும் என்று கவலையாய் இருக்கிறது என்றான். அவனை பார்த்து சிரிப்பதா, அழுவதா என்று எனக்கு தெரியவில்லை.

நேற்றை மற, இன்றை உற்சாகமாக்கு, நாளை நலமாய் அமையும்.