மாமல்லபுரத்தில் மிதக்கும் அருங்காட்சியகம்

சென்னை: மாமல்லபுரத்தில் நீர்மூழ்கி கப்பல் அருங்காட்சியகம்  அமைக்க தமிழக அரசு முடிவு செய்து அதற்கான ஐஎன்எஸ் வாக்லி  என்ற நீர்மூழ்கி கப்பல் மாமல்லபுரத்துக்கு கொண்டு வரப்பட்டது.  இக்கப்பல் தற்போது, மாமல்லபுரம் கடற்கரை கோயில் அருகே  கடற்கரை பகுதியில் இருந்து 300 மீட்டர் தூரத்தில் நிலை  நிறுத்தப்பட்டுள்ளது.
இந்த கப்பலை கடற்கரையில் இருந்து, 400 மீட்டர் தூரமுள்ள  நிலப்பகுதிக்கு கொண்டு வந்து, நிறுத்தி வைத்து அதை சுற்றிலும்  பூங்கா அமைக்க முடிவு செய்யப்பட்டுள்ளது.
சுமார் 1900 டன் எடை கொண்ட கப்பலை கடலில் இருந்து,  நிலப்பகுதிக்கு கொண்டு வர 10 நாட்கள் ஆகும் என  கணக்கிடப்பட்டுள்ளது. இதற்காக சீனா வில் இருந்து, தலா 4 பேர்  கொண்ட 10 பொறியாளர் குழுக்கள் இந்தியா வந்துள்ளனர்.

முதல்கட்டமாக, நீர்மூழ்கி கப்பலின் அடிபாகத்தில் ஸ்டீல் பிளேட்  பொருத்தும்பணி நேற்று முடிவடைந்தது. இதையடுத்து, இன்று முதல்  ஸ்டீல் பிளேட்டுக்கு கீழே காற்று பைகள் (ஏர் பேக்) பொருத்தப்பட்டு,  சிறிது சிறிதாக கப்பலை இழுத்து வர, முயற்சிகள்  மேற்கொள்ளப்படுகிறது. இப்பணியில் கடலில் குதித்து கயிறு கட்டும்  வேலைக்காக சுமார் 30க்கும் மேற்பட்ட உள்ளூர் மீனவ இளைஞர்கள்  பயன்படுத்தப்படுகின்றனர். மேலும், இந்த பணிகள் நடைபெறும்  கடற்பகுதியில் வேறு மீனவர்கள் படகுகளோ, கட்டுமரங்களோ அருகில்  செல்லக்கூடாது என தடை விதிக்கப்பட்டுள்ளது.

கடலில் இருந்து நிலப்பகுதிக்கு கப்பலை இழுத்து வரும் பணிக்காக  படகின் மேல் பொருத்தப்பட்டுள்ள மிதவை பொக்லைன்  இயந்திரங்களும் பயன்படுத்தப்பட உள்ளன. 10 நாட்களுக்குள் கப்பல்  நிலப்பகுதிக்கு கொண்டு வரப்பட்டவுடன் பூங்கா மற்றும்  அருங்காட்சியகம் அமைக்க டெண்டர் விடப்படும். அதன் பின்னரே,  அருங்காட்சியக பணிகள் தொடங்கும் என தெரிகிறது.

நானறி: தினகரன்

ஆவலோடு காத்திருக்கிறோம்.

வரட்டும்!,வரட்டும்!