பூலோக கைலாசம்

by நாஞ்சில் குமார் Mon Apr 21, 2014 1:51 pm

குரு மகான் வேதாத்திரி மகரிஷியின் சிந்தனை தொகுப்பிலிருந்து:

கபீர்தாசர் வீட்டில் பக்தர்கள் வந்து அவரைச் சுற்றி உட்கார்ந்து கொண்டு ஆன்மீகச் சந்தேகங்களுக்கு விளக்கம் கேட்டுக் கொண்டிருந்தனர்.

கபீர்தாசர் அவர்கள் கேட்ட கேள்விகளுக்கெல்லாம் பொறுமையாகப் பதில் சொல்லிக் கொண்டிருந்தார். விளக்கம் கிடைத்தவர்கள் வீட்டுக்கு போய் விட்டார்கள். மாலை 5 மணி. ஒருவர் மட்டும் அங்கே இருந்தார். கபீர்தாசர் உங்களுக்கு என்ன வேண்டும் என்று கேட்டார்?

அவர் என்னுடைய வாழ்க்கை இன்பமாக இல்லை. என் மனைவி சரியில்லை. எனக்கு என்ன செய்வதேன்றே புரியவில்லை என்றார். உடனே கபீர்தாசர் இன்னும் சிறிது நேரம் இங்கு இருங்கள் என்று கூறினார்.

ஒரு பெரிய நூல்கண்டு எடுத்து வந்து வீட்டின் வெளிப்பக்கம் நல்ல வெளிச்சத்தில் உட்கார்ந்தார். அதில் ஏகப்பட்ட சிக்கல். அதை ஒவ்வொன்றாகப் பிரித்து எடுக்க ஆரம்பித்தார். திடீரென்று உள்ளே இருந்த தம்முடைய மனைவியைக் கூப்பிட்டு விளக்கு ஏற்றிக் கொண்டு வா என்றார். அந்த அம்மாவும் ஒரு விளக்கை ஏற்றிக்கொண்டு வந்தார்.

ஏன், எதற்கு? இருட்டாகவில்லையே என்று கூட கேட்கவில்லை. சிறிது நேரம் கழித்து இரு குவளைகளில் பால் கொண்டு வந்து வைத்து விட்டுப் போனார்கள். இருவரும் பாலை எடுத்துக் குடித்தனர்.

வந்திருந்தவர் முகம் சுருங்க ஆரம்பித்து விட்டது. பாலை அவரால் குடிக்க முடிய வில்லை. ஏனெனில் பாலில் உப்பு கலந்திருக்கிறது. வந்தவர் கபீரின் முகத்தைக் கவனித்தார். அவர் முகத்தில் எந்த சலனமும் இல்லை.

வீட்டுக்குள் இருந்த அம்மாள் பாலுக்கு சர்க்கரை போதுமா? இன்னும் வேணுமா என்று கேட்டார்?

இனிப்பு சரியாகவே இருக்கிறது என்றார் கபீர். வந்திருந்தவர் இவை அனைத்தையும் வியப்புடன் கவனித்துக் கொண்டிருந்தார்.

பிறகு கபீரை நோக்கி நான் கேட்ட கேள்விக்கு பதில் சொல்லவில்லையே என்றார்.

கபீர் சொல்கிறார். நான் இப்போ என் மனைவிக்கு என்ன பதில் சொன்னேனோ அது தான் உங்களுக்கும். எந்த குடும்பத்தில் கணவனும், மனைவியும் ஓருவரை ஒருவர் குற்றம் பார்க்காமல் இருக்கிறார்களோ அந்தக் குடும்பம் பூலோகக் கைலாசம் என்று கூறினார்.