இனி கிட்னி திருட்டு நடக்காது! அசத்தும் அரசு மருத்துவமனைகள்

by நாஞ்சில் குமார் Mon Jun 16, 2014 7:30 pm

‘‘இதுவரை சிறுநீரக மாற்று அறுவை சிகிச்சை நடந்தது வேறு மாதிரி. கிட்னியை தானமாகத் தருபவரும், பெறுபவரும் ரத்த உறவாக இருக்க வேண்டும். அவர்களின் ரத்தப் பிரிவு மட்டுமல்ல... திசுக்களின் அமைப்பு கூட பொருந்திப் போக வேண்டும் என்றெல்லாம் விதி இருந்தது. ஆனால், இப்போது அது எதுவுமே தேவையில்லை. வேறு ரத்தப் பிரிவைச் சேர்ந்த கிட்னியையே வெற்றிகரமாக ஒருவருக்குப் பொருத்தி விட்டோம். உலக அளவில் ஹை ரிஸ்க் ஆபரேஷன் இது. அரசு மருத்துவமனையில் நடந்திருக்கிறது’’ என்கிறார் டாக்டர் பலராமன். சென்னை கீழ்ப்பாக்கம் அரசு மருத்துவமனையின் சிறுநீரகத்துறை தலைமை மருத்துவர் இவர்.

‘‘நம்ம மக்கள் எப்பவுமே தனியார் மருத் துவமனைகள்தான் பாதுகாப்பானதுன்னு நினைக் கிறாங்க. ஆனா, அவங்களே செய்ய பயப்படுற சிகிச்சை இது. அப்படியே செய்தாலும் இதற்கு சுமார் 8 லட்ச ரூபாய் வரை கட்டணம் வாங்குவதாகக் கேள்வி. ஆனால் அரசு மருத்துவமனைகள் இந்த விதத்தில் எப்போதுமே ஒரு படி மேலே. இங்கே அனுபவம் இல்லாத டாக்டர்களே கிடையாது. தினமும் நூற்றுக்கணக்கான நோயாளிகளைப் பார்ப்பவர்கள்தான் எல்லோரும். எத்தனை ஆபத்தான ஆபரேஷன் என்றாலும் அதில் உள்ள குட்டிக் குட்டி நுணுக்கங்கள் எங்களுக்கு அத்துப்படி. செய்துடலாம் என்ற நம்பிக்கையும் தைரியமும் எங்களிடம் இருக்கும். இதெல்லாம் தவிர எங்கள் நோயாளிகள் எங்களுக்குத் தரும் நம்பிக்கையும் தனி.

சிறுநீரக செயலிழப்பு பிரச்னை உள்ளவர்கள் வாரா வாரம் டயாலிசிஸ் செய்துகொள்ளவும், மருந்து மாத்திரைகள் வாங்கவும் நிறைய செலவு செய்ய வேண்டியிருக்கும். அதோடு தனி கவனிப்பும் தேவை. அன்றாடம் உழைக்கும் ஏழை மக்கள் இதற்குத் தயாராக இல்லை. பொருளாதார எதிர்பார்ப்பு ஏதும் இல்லாமல், மனிதர்களையும் அவர்கள் நம் மீது வைத்த நம்பிக்கையையும் அடிப்படையாகக் கொண்டு நடத்தப்படும் இது போன்ற முயற்சிகள் வெற்றி பெறுவதில் ஆச்சரியம் ஏதும் இல்லை.

வருங்காலத்தில் இந்த முறையிலான சிறுநீரக மாற்று அறுவை சிகிச்சை பரவலாகிவிட்டால், யாரும் யாருக்கும் கிட்னி தானம் செய்யலாம் என்ற நிலை வந்துவிடும். இன்று ஏழை பாழைகளிடம் நட க்கும் கிட்னி திருட்டை அது தடுக்கும்’’ என்கிறார் அவர் நம்பிக்கையோடு.இதே மாதிரி, ‘அரசு மருத்துவமனை சாதனை’ என்ற தலைப்புச் செய்திகளை அடிக்கடி பார்க்க முடிகிறது. ஆனாலும் ம க்களிடம் ஏன் அரசு மருத்துவமனைகள் மீது முழு நம்பிக்கை இல்லை? டீன் ராமகிருஷ்ணனிடம் கேட்டோம்...

‘‘இந்த மருத்துவமனையின் இணைப்பு மருத்துவமனையான ராயப்பேட்டை அரசு மருத்துவமனையில்தான் முதன்முதலில் கிட்னி மாற்று அறுவை சிகிச்சை நடந்தது. தமிழகத்தில் மருத்துவத்துறையில் ஏற்படும் முக்கியமான சாதனைகள் பலவும் முதன்முதலில் அரசு மருத்துவமனைகளில்தான் நிகழ்கின்றன. உதாரணமாக, சென்னை எம்.எம்.சியில்தான் ‘போன் பேங்க்’ எனச் சொல்லப்படும் எலும்பு வங்கி சிறப்பாகச் செயல்படுகிறது. அதேபோல் ஸ்டான்லி அரசு மருத்துவமனையில் இம்யூனாலஜி எனப்படும் நோய் எதிர்ப்பு சக்தித் துறை சாதனை படைக்கிறது.

கீழ்ப்பாக்கம் மருத்துவமனையைப் பொறுத்த அளவில் தீக்காய சிகிச்சை வார்டில் மட்டுமே ஐம்பது பெட்டுகளை ஏற்படுத்தி சென்டர் ஆஃப் எக்சலன்ஸ் என்ற அவார்டை வாங்கியிருக்கிறோம். அதே போல மூட்டு சிகிச்சை, சர்க்கரை நோயாளிகள் பராமரிப்பு, ரேடியாலஜி என பல துறைகளில் முன்னேற்றங்கள் நடைபெற்றுக் கொண்டிருக்கின்றன.

இலவச மருத்துவமனைகளாக இருப்பதாலும், எப்போதும் கூட்டம் அதிகம் இருப்பதாலும், தனியார் மருத்துவமனை மாதிரி அலங்காரம் ஏதும் செய்துகொள்ளாமல் இருப்பதாலும் பொதுமக்களுக்கு ஒரு சலிப்பு இருக்கலாம். ஆனால் அரசு மருத்துவமனைக்கும் இங்கு பணிபுரியும் டாக்டர்களுக்கும் லாப நோக்கம் இல்லை என்பதை மறந்துவிடக்கூடாது. ‘ஆடம்பரமும் அலங்காரமும் வேண்டாம்... சிகி ச்சை மட்டுமே முக்கியம்’ என்கிறவர்கள் எப்போதுமே இங்கு வரலாம்!’’ என்கிறார் அவர் பெருமிதத்தோடு! தமிழகத்தில் மருத்துவத்துறையில் ஏற்படும் முக்கியமான சாதனைகள் பலவும் முதன்முதலில் அரசு மருத்துவமனைகளில்தான் நிகழ்கின்றன.

நன்றி: தினகரன்