பாடு என்றான் – குடும்ப விளக்கு

குடும்ப விளக்குபாரதிதாசன்

பாரதிதாசன் எழுதிய குடும்ப விளக்கு என்ற கவிதை நூலில், `பாடு என்றான்’ என்ற தலைப்பில், குடும்பத் தலைவியின் தமிழ் பாடல் மற்றும் இசையின் மாண்பை பாவேந்தர் அழகாக  விளக்குகிறார்.

பாடு என்றான்

அனைவரும் உண்டார் அங்கே!
கூடத்தில் அமர்ந்தி ருந்தார்.
சுனைவரும் கெண்டைக் கண்ணாள்
துணைவனை அணுகி, “நீவிர்
எனைவரும் படிஏன் சொல்ல
வில்லை” என்றாள் சிரித்தே!
‘தினைவரும் படிஇல் லார்க்கும்
திருநல்கும் தமிழ்பா’ டென்றான்.

யாழ் எடுத்தாள்

குளிர்விழி இளநகைப் பூங்
குழலினாள் குந்தினாள்; தன்
தளிருடல் யாழ் உடம்பு
தழுவின; இரு குரல்கள்
ஒளியும் நல்வானும் ஆகி
உலவிடும் இசைத்தேர் ஏறித்
“தெளிதமிழ்” பவனி வந்தாள்
செவிக்கெலாம் காட்சி தந்தாள்.

கவிதை பாய்ச்சினாள்

உள்ளத்தில் கவிதை வைத்தே
உயிரினால் எழுப்பி னாள்;அவ்
வெள்ளத்தில் சுவையைக் கோத்தாள்;
வீணையின் அளவிற் சாய்த்தாள்;
தெள்ளத்தெ ளிந்த நீர்போல்,
செந்தமிழ்ப் பொருள்போல் நெஞ்சப்
பள்ளத்தில் கோடைத் துன்பம்
பறந்திடப் பாய்ச்சி விட்டாள்.

உயிரெல்லாம் தமிழில் தொக்கின

வீடெல்லாம் இசையே; வீட்டில்
நெஞ்செலாம் மெருகே; நெஞ்ச
ஏடெலாம் அறிவே; ஏட்டின்
எழுத்தெலாம் களிப்பே; அந்தக்
காடெலாம் ஆடும் கூத்தே;
காகங்கள் குருவி எல்லாம்
மாடெல்லாம் இவ்வா றானால்
மனிதர்க்கா கேட்க வேண்டும்?


நன்றி: தினமணி

அருமையான விளக்கம்