தேச நலனுக்காவது சைக்கிள் ஓட்டலாமே

by நாஞ்சில் குமார் Thu Aug 21, 2014 10:59 pm

பழையன கழிதலும் புதியன புகுதலும் காலத்தின் கட்டாயம். ஆனால் அடுத்தவர்களிடம் கையேந்தும் நிலை வரும்போது இறப்பதே மேல் என்பது சரியானதாகும். இந்தியா பெட்ரோலிய பொருட்களுக்கு மற்ற நாடுகளை நம்பி இருப்பதால் பெட்ரோலிய பொருட்களின் விலை வின்னை தொட்டு நம்மை கீழே விழ வைப்பதற்குள் உஷாராக வேண்டியது ஒவ்வொரு இந்தியனின் கடமை. மாற்று ஏற்பாடுகள் கை கொடுக்கும் ஆனால் முழுமையாக உதவும் எனபதில் உத்தரவாதம் இல்லை. அதற்காக பயன்பாட்டை குறைப்பதால் நாட்டின் வளர்ச்சி பாதிக்கும் எனவே, பயன்பாட்டை சரி செய்யலாம்.

சைக்கிளில் பயணம் செய்ய ஆரம்பிக்கும் போது பெட்ரோல் பயன்பாடு குறைவது மட்டுமல்லாமல் உடல் ஆரோக்கியத்திற்கும் உதவுகிறது என்பது மறுக்க முடியாத உண்மை. 19ம் நூற்றாண்டில் ஐரோப்பாவில் முதலில் அறிமுகப்ப-டுத்தப்பட்து சைக்கிள். ஆனால் கால ஓட்டத்தில் இன்று சைக்கிள் காணாமல் போய் கொண்டிருக்கிறது. தற்போது சிறுவர்கள் விளையாட்டு பொருளாகவும், உடற்பயிற்சி சாதனமாகவும், தபால் பட்டுவாடா மற்றும் சைக்கிள் ரேஸ் என்ற குறுகிய வட்டத்திற்குள் சைக்கிள் பயன்பாடு வந்துவிட்டதை மறுக்க முடியாது.

உலகில் மக்கள் தொகையில் முதல் நாடான சீனாவில் சைக்கிள் பயன்படுத்துவோர் 90 சதவீதம் உள்ளனர். கார் வைத்திருந்தாலும் சைக்கிளும் வைத்துள்ளனர். இதனால் பெட்ரோலிய பொருட்களன் பயன் வெகுவாக குறைவதுடன் வண்டிகள் வெளியிடும் புகையினால் ஏற்படும் மாசு குறைகிறது.

இந்தியாவில் ஆடம்பர தேவைக்கு வாகன பயன்பாடு அதிகரித்து வருவது கவலைக்குரிய விஷயமாகும். நகரம் மட்டுமின்றி கிராமங்களிலும் சைக்கிள் பயன்பாடு குறைந்து வருவதுடன் இதனால் போக்குவரத்து நெரிசல் ஏற்படுவதை கண்கூட காண்கிறோம். மேலும், இதனால் அன்னிய செலாவணி கையிருப்பு குறைவதுடன் அதனை சரி செய்வதற்கு வரி மற்றும் பொருட்களின் விலையேற்றம் ஆகிய தாங்கமுடியாத சுமையை ஒவ்வொரு குடிமகனும் ஏற்றுகொள்ள வேண்டிய கட்டாயம் ஏற்படுகிறது. நாம் சைக்கிள் பயணத்தின் முக்கியத்துவம் உணரவேண்டிய நேரம் வந்துவிட்டது.

நாட்டின் பொருளாதார முன்னேற்றத்தில் சைக்கிளுக்கும் பங்குண்டு என்பதை உணரவேண்டும். ஆம் இந்திய மக்கள் தொகைக்கு ஏற்ப வாகனங்கள் பெருகினால் என்ன -ஆவது? அதனால் ஏற்படும் மாசு அளவீடு என்ன? சாலையின் தேவை என்ன? இப்படி கணக்கிட்டால் பற்றாக்குறை தான் மிஞ்சும். நம் நாட்டிலே கிடைக்கும் தண்ணீரையே காசு கொடுத்து வாங்கும் நிலை உள்ளதால் பெட்ரோலுக்கு மற்ற நாட்டை நம்பி இருக்கும் நாம் எதிர்கால திட்டமிடல் மிக முக்கியமாகிறது. எனவே சைக்கிள் பயன்பாட்டை அதிகரிப்போம், ஆதரிப்போம்.

சைக்கிளில் செல்ல ஆயத்தமாவோம் தேசத்தின் வளர்ச்சிக்கு புதிய பாதை வகுப்போம்.

நன்றி: தினகரன்