ஆஸ்துமா திருப்பி வருமா?

by நாஞ்சில் குமார் Fri Sep 19, 2014 11:11 pm

எனக்கு சிறு வயதில் ஆஸ்துமா இருந்ததாக கருதி, அதற்கு மருத்துவமும் பார்க்கப்பட்டு வந்தது. இப்போது ஆஸ்துமா தொந்தரவு இல்லாத தால் மருத்துவத்தை நிறுத்திவிட்டேன். ஆஸ்துமா ஒரு முறை வந்தால் அதனை கட்டுப்படுத்தலாமே தவிர அதனை முற்றிலும் குணப்படுத்த இயலாது என்றும் சொல்கிறார்களே... அப்படி என்றால் எனக்கு ஆஸ்துமா திருப்பி வருமா?

நுரையீரல் சிறப்பு மருத்துவர் லோகமூர்த்தி

சிறு வயதில் ஆஸ்துமா நோய் பாதிப்புக்கு ஆளானவர்களில் சுமார் 50 சதவிகிதத்தினருக்கு பருவ வயதிலோ, அதற்குப் பின்போ, நோயின் தாக்கம் குறையவும் முற்றிலும் குணம் அடையவும் வாய்ப்புண்டு. ஆனால், இது Mild Asthma வகையாக இருந்தால் மட்டுமே நடைபெறும்.

எல்லா வகையான ஆஸ்துமாவுக்கும் தொடர்ந்து இன்ஹேலர் பயன்படுத்த வேண்டும். நெஞ்சக மருத்துவரின் (Pulmonologist) ஆலோசனை பெற்ற பிறகே அதன் உபயோகத்தை நிறுத்த வேண்டும். தன்னிச்சையாக நோயின் தாக்கம் குறைந்து விட்டது அல்லது முற்றிலும் இல்லை என்று மருத்துவத்தை நீங்களாக நிறுத்துவது ஏற்புடையது அல்ல. உங்களுடையது Mild Asthma வகையாக இருக்கும் வாய்ப்புகள் அதிகம். நெஞ்சக மருத்துவரை அணுகி ஒரு ஆலோசனை பெற்று செயல்படுவது நலம்.

நன்றி: தினகரன்