நீரிழிவுக்கான டயட்

[You must be registered and logged in to see this image.]

என் மாமியாருக்கு வயது 66. இரு மாதங்களுக்கு முன்புதான் நீரிழிவு உறுதி செய்யப்பட்டது. தொடக்கத்திலேயே மருந்து, மாத்திரைகள் தேவையில்லை என்றும், வெறும் உடற்பயிற்சியும் உணவுக்கட்டுப்பாடும் மட்டுமே போதும் என்றும் சொல்லப்படுவது எந்தளவு உண்மை?

நீரிழிவு மருத்துவர் நந்தகுமார் ஏ.கே.வேலு

உங்கள் மாமியாருக்கு சில வருடங்களுக்கு முன்பே நீரிழிவு வந்திருக்கக் கூடும். நீரிழிவு என்பது அமைதியாகத் தாக்கும் ஒரு நோய். இந்த வயதில் நீரிழிவு வந்திருப்பதால் உங்கள் மாமியாருக்கு மிகத் தீவிரமான சிகிச்சைகள் அவசியப்படும். 66 வயது எனக் குறிப்பிட்டிருக்கிறீர்கள். இந்த வயதில் நீரிழிவு வந்தால், அதன் தொடர்ச்சியாக உடலின் மற்ற உறுப்புகளும் பழுதடையும் வாய்ப்புகள் அதிகம்.

அப்படி எந்தப் பிரச்னையும் வராமலிருக்க வேண்டும் என்றால் உடனடியாக நீரிழிவுக்கான மருந்துகளை அவர் எடுத்துக் கொள்ள வேண்டும். அவரது ரத்த சர்க்கரையின் அளவைப் பொறுத்து, அதற்கேற்ப மருந்துகள் பரிந்துரைக்கப்படும். தேவைப்பட்டால் இன்சுலினும் எடுத்துக்கொள்ள அறிவுறுத்தப்படுவார். ஹெச்.பி.ஏ.ஒன்.சி. டெஸ்ட் எடுத்துப் பார்த்தால், உங்கள் மாமியாரின் நீரிழிவு நிலை துல்லியமாகத் தெரிந்து விடும்.

நீரிழிவு கட்டுப்பாட்டில் இல்லை என்றால் அது சிறிய ரத்தக்குழாய்கள், பெரிய ரத்தக்குழாய்கள், கண்கள், சிறுநீரகங்கள், இதயம் என எல்லாவற்றையும் பாதிக்கும். அத்தகைய பாதிப்புகள் வராமல் தடுக்கத்தான் மருந்துகள் எடுத்துக் கொள்ள வேண்டியது அவசியமாகிறது.உணவுக் கட்டுப்பாடு, உடற்பயிற்சி போன்றவையும் மிக முக்கியம். தினசரி உணவில் 3ல் 1 பங்கு கோதுமை சேர்த்துக் கொள்ள வேண்டும். 1 பங்கு புரதச்சத்து நிறைந்த உணவுகளை எடுத்துக் கொள்ள வேண்டும். மீதி ஒரு பங்கு முள்ளங்கி, நூல்கோல், கீரை போன்றவை.

கோதுமையைத் தவிர்க்க நினைப்போருக்கு ஒரு சின்ன அட்வைஸ். கோதுமை உணவு என்பது 500 ரூபாய் நோட்டு மாதிரி. மெல்ல மெல்ல வைத்திருந்து செலவு செய்யலாம். அரிசி உணவு என்பது 100 ரூபாய் நோட்டு மாதிரி. எடுத்ததுமே செலவாகி விடும்! மூன்று வேளை மூக்கைப் பிடிக்க சாப்பிடுவதைத் தவிர்த்து, சின்ன அளவுகளில் 5 வேளைகளாகப் பிரித்து சாப்பிடுவது நலம். தினம் ஒரு சுண்டல் சேர்த்துக் கொள்ளலாம்.

நீரிழிவு நோயாளிகள் இதையெல்லாம் தொடவே கூடாது என எதுவும் இல்லை. மாம்பழம் சாப்பிடலாமா எனக் கேட்பார்கள். தாராளமாகச் சாப்பிடலாம். ஆனால், அதனுடன் எடுத்துக் கொள்கிற அல்லது அடுத்து சாப்பிடப் போகிற உணவு அதை பேலன்ஸ் செய்கிற வகையில் இருக்கும்படி பார்த்துக் கொள்ள வேண்டும். இரவில் கண்டிப்பாக கோதுமை உணவுகளை எடுத்துக் கொள்வதும் அவசியமாகிறது.

நன்றி: தினகரன்

பயனுள்ள தகவல்