மார்ச் மாதத்திற்குள் நாட்டு மக்கள் அனைவருக்கும் ஆதார் எண் : மத்திய அரசு கெடு

டெல்லி: வரும் மார்ச் மாதத்திற்குள் நாட்டு மக்கள் அனைவருக்கும் ஆதார் அட்டை வழங்க வேண்டும் என பிரதமர் அலுவலகம் உத்தரவிட்டுள்ளதாக தகவல் வெளியாகியுள்ளது. முந்தைய காங்கிரஸ் அரசால் அறிமுகப்படுத்தப்பட்ட ஆதார் அட்டை திட்டம் தொடரும் என அறிவித்த மோடி தலைமையிலான அரசு, இதுவரை ஆதார் எண் பெறாதவர்களுக்கு அதனை விரைந்து வழங்க நடவடிக்கை மேற்கொண்டுள்ளது. அடுத்த ஆண்டு டிசம்பர் மாதத்திற்குள் அனைவருக்கும் ஆதார் அட்டை வழங்க முடிவு செய்யப்பட்டிருந்த நிலையில், அடுத்த ஜுன் மாதத்திற்குள்ளாகவே இப்பணிகளை முடிக்க வேண்டும் என கடந்த சில மாதங்களுக்கு முன் உத்தரவிடப்பட்டிருந்தது. இந்நிலையில் குறித்த கெடுவிற்கு மூன்று மாதங்களுக்குள்ளாகவே அதாவது வரும் மார்ச் மாதத்திற்குள் அனைவருக்கும் ஆதார் எண் வழங்க வேண்டும் என, ஆதார் ஆணையத்திற்கு பிரதமர் அலுவலகம் உத்தரவிட்டுள்ளதாக தெரிகிறது.

அண்மையில் இத்திட்டம் தொடர்பாக நடைபெற்ற ஆலோசனை கூட்டத்தில், ஆதார் மற்றும் தேசிய மக்கள் தொகை பதிவு பணிகளை மார்ச் மாதத்திற்குள்ளாக முடிக்க வேண்டும் என அறிவுறுத்தப்பட்டுள்ளதாக மத்திய அரசு அதிகாரி ஒருவர் தகவல் தெரிவித்துள்ளார். முந்தைய அரசால் அறிமுகப்படுத்தப்பட்ட நேரடி மானியம் வழங்கும் திட்டம் மட்டுமின்றி, பிரதமரின் ஜன் தன் ஜோன் ஜனா உள்ளிட்ட பல்வேறு திட்டங்களையும் ஆதார் எண்ணுடன் இணைத்து செயல்படுத்த மத்திய அரசு திட்டமிட்டுள்ளதே இந்த அறிவுறுத்தலுக்கு காரணமாக கூறப்படுகிறது. ஆந்திரா, கேரளா, டெல்லி உள்ளிட்ட 9 மாநிலங்களில் ஏற்கனவே 90 சதவீதம் பேருக்கு ஆதார் எண் வழங்கப்பட்டுள்ள நிலையில், மத்திய அரசின் இந்த அறிவுறுத்தலால் எஞ்சிய மாநிலங்களிலும் ஆதார் எண் வழங்கும் பணிகள் தீவிரமடையும் என எதிர்பார்க்கப்படுகிறது.

- தினகரன்

தகவலுக்கு நன்றி அண்ணா