முதுகு வலி ஏற்பட காரணம் தெரியுமா?

by mohaideen Tue Mar 24, 2015 6:28 pm

மூளையின் தொடர்ச்சியான தண்டுவடம் இடுப்பு பகுதி வரையில் நீண்டிருக்கும். இத்தகைய முதுகெழும்பு ஒன்றுடன் ஒன்றாக இணைக்கப்பட்ட 33 சிறு துண்டு எலும்புகளை கொண்டது. இதில் முதல் 7 எலும்புகள் கழுத்துப்பகுதியிலும், 12 எலும்புகள் மார்பு பகுதியிலும், 5 எலும்புகள் இடுப்பு பகுதியிலும், கடைசி 4 எலும்புகள் சேர்ந்து ஒரே எலும்பாய் முதுகின் அடிப்பகுதியிலும் அமைந்துள்ளது. இவற்றில் கடைசி 9 எலும்புகள் அசைவற்றதாகவும், இதர 24 எலும்புகள் அசையக்கூடியதாகவும் இருக்கும். எலும்புகளுக்கு இடையில் மெல்லிய ஜவ்வு போன்ற டிஸ்க் பகுதி அமைந்துள்ளது.

இந்த டிஸ்க்குகள் உடலில் ஏற்படும் அதிர்வை தாங்கிக்கொள்ள பயன்படுகிறது. முதுகெலும்பு நேராக இல்லாமல் சில வளைவுகளுடன் இருக்கும். முதுகெலும்பின் நடுவில் இருக்கும் தண்டுவடத்தில் இருந்து 31 ஜோடி நரம்புகள் முதுகெலும்புகளுக்கு இடையில் உள்ள துவாரத்தின் வழியாக வெளியேறி உடலின் பல முக்கிய உறுப்புகளுக்கு சென்று செயல்பட வைக்கிறது. பொதுவாக முதுகுவலி ஏற்பட பல காரணங்கள் உள்ளன. அவை பின்வருமாறு:

டிஸ்க் ப்ரொலாப்ஸ் :

முதுகெலும்புகளுக்கு இடையில் ஷாக் அப்சர்வர் போல் இயக்கும் டிஸ்க் எனும் மெல்லிய ஜவ்வு வயதாவதாலோ, காயம் பட்டதினாலோ அல்லது அலற்சியினாலோ தேய்ந்து விடும். அப்போது 2 எலும்புகளுக்கு இடையே போதிய இடைவெளி இன்றி டிஸ்க் எலும்பை விட்டு வெளியே பிதுங்கி விடும். இதனால் அதன் அருகில் செல்லும் ரத்தக்குழாயையோ, நரம்பையோ அழுத்தி வலியை உண்டு பண்ணும்.

ஸ்பாண்டிலோசிஸ் :

வயதாகி எலும்புகளில் தேய்மானம் ஏற்படுவதாலும் எலும்புகளுக்கு இடையே சில தாதுக்கள் படிவதாலும் எலும்புகளுக்கு இடையே உராய்வு ஏற்படும். இதனால் அழற்சியோ, கிருமி தொற்றோ ஏற்பட்டு வலி ஏற்படும்.

ஆஸ்டியோபொரோஸிஸம் :

உடலின் கால்சியம் சத்துக்களின் அளவு வயதாவதினாலோ பெண்களுக்கு மாதவிடாய் நின்ற பிறகோ குறைந்து விடலாம். இதனால் எலும்புகளில் போதிய அளவு சுண்ணாம்பு சத்து இல்லாததால் எலும்புகள் வலுவிழந்து அடர்த்தி குறைவாகிவிடும். இதனாலும் எலும்புகளில் வலியும், எலும்பு முறிவும் ஏற்படலாம்.

ஸ்பான்டிலோஸிஸ்தஸிஸ்:

முதுகெலும்பு வலுவிழக்கும்போது வரிசையாய் இருக்க வேண்டிய எலும்புகளில் ஒன்றிரண்டு வரிசையிலிருந்து முன்புறமோ பின்புறமோ விலகி விடும். இதனாலும் முதுகுவலியோ, முதுகுதசை பிடிப்போ, மரத்து போதலோ ஏற்படலாம். இது 35 வயதிற்கு மேற்பட்டவர்களுக்கு ஏற்படுகிறது.

ஆர்த்ரைட்டிஸ் :

மூட்டுக்களில் ஏற்படும் அழற்சியே ஆர்த்ரைட்டிஸ். இது ருமடாய்டு ஆர்த்ரைட்டிஸ், ஆன்க்கிலோசிஸ் ஸ்பான்டிலோசிஸ் போன்ற நோய்களின் விளைவால் ஏற்படக்கூடியதாக இருக்கும்.

நவீன சிகிச்சைகள் :

பேக் அண்ட் நெக் கட்டமைப்பு மருத்துவத்தில் டிஸ்க் ப்ரொலாப்ஸை அறுவை சிகிச்சையின்றி கட்டுப்படுத்தலாம். நவீன மருத்துவ முறையில் வடிவமைக்கப்பட்ட கருவிகள் முதுகுவலிக்கும், கழுத்து வலிக்கும் சிகிச்சையளிக்க பயன்படுகிறது. இச்சிகிச்சை முறை 86 சதவீதம் வரை வலியை குறைத்து நோயாளி தன் இயல்பு வாழ்க்கைக்கு திரும்ப உதவுகிறது.

தினகரன்