அடிக்கடி சிறுநீர் வருகிறது. எரிச்சலாக உள்ளது. இதைத் தடுக்க என்ன செய்ய வேண்டும்?

எனக்கு வயது 19. கடந்த சில நாட்களாகச் சிறுநீர் கழித்தால் எரிச்சலாக உள்ளது. எங்கள் வீட்டில் உள்ளவர்கள் சூட்டின் காரணமாகத்தான் இப்படி இருக்கும் என்று சொன்னார்கள். அதனால் இளநீர் போன்ற குளிர்ச்சி தரும் பொருட்களை அருந்தினேன். சில நாட்கள் சரியாக இருந்தது. கோழி இறைச்சி சாப்பிட்டால் திரும்பவும் எரிகிறது. அடிக்கடி சிறுநீர் வருகிறது. இதைத் தடுக்க என்ன செய்ய வேண்டும்?

- ஹனீபா, மின்னஞ்சல்

தண்ணீர் குடிக்காமல் இருப்பது இதற்கு ஒரு காரணம். சிறுநீர் என்பது கபத்தின் இருப்பிடம், அங்குப் பித்தம் சேர்ந்ததால் சிறுநீர் எரிச்சலுடன் போகலாம். ஒரு Ultrasound abdomen pelvis செய்து சிறுநீர்ப் பையில் கற்கள் இருக்கிறதா என்று பார்க்க வேண்டும். காலையில் முதலில் செல்லும் சிறுநீரில் நடுவில் வரும் சிறுநீரைப் பிடித்து (Midstream urine) Culture and sensitivity பரிசோதனை செய்ய வேண்டும். பழுப்பு அணுக்கள் உள்ளனவா என்று பார்க்க வேண்டும்.

அதற்குப் பின் நெருஞ்சி முள் கஷாயத்தில் கற்பூரச் சிலாஜி பஸ்மம் சேர்த்துச் சாப்பிடலாம். சதாவரி லேகியம் காலையிலும் மாலையிலும் இரு வேளை சாப்பிடலாம். நன்னாரி மணப்பாகு இரண்டு நேரம் சாப்பிடலாம். காரம், புளி, எண்ணெய், உப்பு போன்றவற்றைக் குறைக்க வேண்டும். மீண்டும் மீண்டும் வருகிறது என்று சொன்னால், எந்தக் காரணத்தால் வருகிறது என்பதைத் தெளிவாகக் கண்டறிய வேண்டும்.

இதற்கு Blood urea, Creatinine, Uric acid போன்றவற்றைப் பார்ப்பதும், மூத்திரத்தில் பழுப்பு இருக்கிறதா என்றும், Ultrasonogram செய்து பார்ப்பதும் நல்லது. நிறைய தண்ணீர் குடிக்க வேண்டும். வாழைத் தண்டு, கொத்தமல்லி, அகத்திக் கீரை போன்றவற்றை உணவில் அதிகம் சேர்த்துக்கொள்ளலாம். இளநீர் குடிக்கலாம். கரும்புச் சாறு குடிக்கலாம்.

Chronic relapsing prostatitis உள்ளவர்களுக்கு ஆயுர்வேதத்தில் சந்திரபிரபா என்று ஒரு குளிகை உள்ளது. அதை உணவுக்குப் பின் இரண்டு வேளை சாப்பிடலாம்.

பிரபல ஆயுர்வேத மருத்துவர் டாக்டர் எல். மகாதேவன்
மின்னஞ்சல்: nalamvaazha@thehindutamil.co.in

நன்றி: தி இந்து

மருத்துவ குறிப்புக்கு நன்றி

தகவலுக்கு நன்றி

பகிர்வுக்கு நன்றி அண்ணா