விபத்துக்களை தவிர்க்க தண்டவாளங்களில் தானியங்கி பேனர் கொடி

விபத்துக்களை தவிர்க்க திருச்சி, திருவிடைமருதூர் ஆகிய இடங்களில் ரயில்வே நிர்வாகம் தானியங்கி பேனர் கொடி வைத்துள்ளது. திருச்சி, சேலம், மதுரை, சென்னை, திருவனந்தபுரம், பாலக்காடு ஆகிய 6 கோட்டங்களை உள்ளடக்கியது தென்னக ரயில்வே. ரயில்வே கிராசிங்கை தாண்டி உள்ள பகுதிகளுக்கு செல்ல ரயில்வே கேட் அமைக்கப்பட்டு போக்குவரத்திற்கு வழிவிடப்பட்டுள்ளது. ரயில்வே கிராசிங் பகுதிகளில் விபத்துகளை தவிர்ப்பதற்காக பெரும்பாலான கிராசிங் பகுதிகளில் ஆட்கள் நியமிக்கப்பட்டு ரயில்வே வரும் போது கேட் மூடப்பட்டும். சென்றவுடன் போக்குவரத்திற்கு கேட் திறக்கப்படும்.

இப்படி இருக்கும் போது ரயில்வே கேட் பணியில் இருக்கும் ரயில்வே ஊழியரின் அலட்சியத்தால் சில நேரங்களில் விபத்துகள் நடக்கும். இதை தடுக்கும் விதமாக ரயில்வே கேட் பகுதிகளில் இரு தண்டவாளங்களுக்கு இடையில் சிவப்பு நிறத்திலான பேனர் கொடி கட்டப்படும். சிவப்பு நிறத்திலான கொடி கட்டப்பட்டிருந்தால் அபாயம் உள்ளது என அறிந்து இன்ஜின் டிரைவர் ரயிலை நிறுத்திவிடவேண்டும். இல்லையென்றால் சிக்னல் கிடைத்துவிட்டதாக கருதி ரயில் கிராசிங்கை கடந்து செல்லும். சிவப்பு நிறத்திலான கொடியை நட்டு வைப்பதும், ரயில் வரும் போது கொடியை அகற்றுவதும் கேட் கீப்பரின் பணியாக இருந்து வந்தது.

தற்போது தெற்கு ரயில்வே தானியங்கி பேனர் கொடியை அறிமுகப்படுத்தி முன்னோட்டமாக சேலம் கோட்டத்திற்குட்பட்ட திருச்சி அருகே உள்ள கம்பரசம்பேட்டை வெள்ளான் ெதருவிலும், திருச்சி கோட்டத்திற்குட்பட்ட திருவிடை மருதூர் அருகே உள்ள திருநாகேஸ்வரம் பகுதியிலும் ரூ.3500 செலவில் தானியங்கி பேனர் கொடி பொருத்திஉள்ளது. தானியங்கி பேனர் கொடி, ரயில் கேட்டை கேட் கீப்பர் மூடும் போது தண்டவாள பகுதியில் இருந்து விலகியும், கேட் திறக்கும் போது தண்டவாள பகுதியிலும் வந்து நிற்கும். இதனால் ரயில்வே கேட் பகுதிகளில் கேட் கீப்பர் கவனகுறைவால் நடக்கும் விபத்துகளை தவிர்க்கலாம். சோதனைக்கு பின் படிபடியாக அனைத்து ரயில்வே கேட் பகுதிகளுக்கும் இது பொருத்தப்படும் என ரயில்வே அதிகாரி ஒருவர் தெரிவித்தார்.

வரவேற்கிறோம்.