இந்தியாவின் தேஜஸ் ரக போர் விமானங்களை வாங்க இலங்கை ஆர்வம்

இந்தியாவின் சொந்தத் தயாரிப்பில் உருவாக்கப்பட்டுள்ள உலகிலேயே மிகவும் இலகு ரக போர் விமானமான "தேஜஸ்' விமானங்களை வாங்குவதற்கு இலங்கை மற்றும் எகிப்து ஆகிய நாடுகள் ஆர்வம் தெரிவித்துள்ளன.

சீனாவின் உதவியுடன் தயாரித்த ஜேஎஃப்-17 ரக விமானத்தை இலங்கைக்கு விற்பனை செய்ய பாகிஸ்தான் முன்வந்தது. ஆனால், அதை இலங்கை அரசு நிராகரித்துவிட்டது.

இதேபோல், பிரான்ஸிடம் இருந்து 24 ரஃபேல் ரக போர் விமானங்களை வாங்குவது தொடர்பான ஒப்பந்தத்தை எகிப்து கடந்த ஆண்டு செய்து கொண்டது.

இந்நிலையில், இந்தியாவிடம் இருந்து தேஜஸ் ரக போர் விமானங்களை தற்போதைய வடிவத்திலேயே பெற இலங்கையும், எகிப்தும் விருப்பம் தெரிவித்திருக்கின்றன.

இதுகுறித்து தேஜஸ் ரக விமானத்தை தயாரிக்கும் பணியில் ஈடுபட்டுள்ள ஹிந்துஸ்தான் ஏரோநாடிக்ஸ் லிமிடெட் (ஹெச்ஏஎல்) நிறுவனத்தின் தலைவர் ஸ்வர்ணா ராஜு தெரிவிக்கையில், "இந்திய விமானப்படைக்கு தேவையான விமானங்களைத் தயாரித்து தருவதில்தான் முதலில் நாங்கள் கவனம் செலுத்துவோம்' என்றார்.

தேஜஸ் ரக விமானங்களை வாங்குவதற்கு எந்தெந்த நாடுகள் விருப்பம் தெரிவித்திருக்கின்றன? என்ற கேள்விக்கு அவர் பதில் அளிக்க மறுத்துவிட்டார்.

ஆனால், பாதுகாப்புப் படை வட்டாரத் தகவல்கள் கூறுகையில், "இலங்கையும், எகிப்தும் மட்டுமே தற்போது விருப்பம் தெரிவித்துள்ளன' என்றன.

இந்திய விமானப்படையில் இருக்கும் மிக்-21 ரக போர் விமானங்களுக்கு மாற்றாக, புதிய ரக போர் விமானங்களைச் சேர்க்கும் திட்டம் கடந்த 1983ஆம் ஆண்டில் வகுக்கப்பட்டது. ஆனால், பல்வேறு இடர்பாடுகள் காரணமாக அந்தத் திட்டம் செயல்படுத்தப்படுவது ஒத்திவைக்கப்பட்டு வந்தது.

தேஜஸ் ரக விமானம் கடந்த 2001ஆம் ஆண்டு ஜனவரி மாதம் முதன்முதலில் பறக்கவிடப்பட்டது. பிறகு, கடந்த 2015ஆம் ஆண்டு ஜனவரி மாதம் இந்திய விமானப்படையில் சேர்க்கப்பட்டது.

இந்நிலையில், பஹ்ரைன் நாட்டில் கடந்த ஜனவரி மாதம் நடைபெற்ற போர் விமானங்கள் கண்காட்சியில் தேஜஸ் ரக விமானத்தை இந்தியா முதல்முறையாக காட்சிக்கு வைத்தது. அதையடுத்து, தேஜஸ் ரக விமானங்களுக்கு வெளிநாடுகள் மத்தியில் வரவேற்பு கிடைக்கத் தொடங்கியுள்ளது. முன்னதாக, பஹ்ரைன் கண்காட்சியில் இந்தியா தேஜஸ் ரக விமானத்தை காட்சிக்கு வைத்ததையடுத்து, அந்தக் கண்காட்சியில் இருந்து தனது ஜேஎஃப்-17 ரக விமானத்தை பாகிஸ்தான் விலக்கிக் கொண்டது குறிப்பிடத்தக்கது.

-
தினமணி