தொண்டனாக இருந்து பணியாற்றியவர் மகாத்மா காந்தி:நடிகர் கமல்ஹாசன்

மகாத்மா காந்தி தலைவனாக இல்லாமல் தொண்டனாக
இருந்து பணியாற்றியதால்தான் உச்சத்தை அடைய
முடிந்தது என, நடிகர் கமல்ஹாசன் பேசினார்.

கோவை சப்னா புத்தக நிலையம் சார்பில் மகாத்மா
காந்தியின் “சத்திய சோதனை’ என்ற நூலை பொதிகை
தொலைக்காட்சியின் கோவை மண்டல இயக்குநர்
ஆண்டாள் பிரியதர்ஷினி தமிழில் மொழிபெயர்த்துள்ளார்.
அந்தப் புத்தக வெளியீட்டு விழா கோவையில் ஞாயிற்றுக்
கிழமை நடைபெற்றது.

இந்த விழாவில் கலந்து கொண்டு புத்தகத்தை வெளியிட்டு
நடிகர் கமல்ஹாசன் பேசியதாவது:

முன்பு ஒரு காலத்தில் காந்தியை விமர்சனம் செய்த
கூட்டத்தின் மத்தியில் இருந்த நான், பின்னாளில் காந்தியைப்
பின்பற்றத் தொடங்கினேன். காந்தியை அறிந்து கொள்ள
எனக்கு 30 ஆண்டுகளுக்கு மேல் தேவைப்பட்டது.

அகிம்சையை பின்பற்றுவது என்பது வீரம் ஆகும்.
அதை யாராலும் எளிதாகப் பின்பற்ற முடியாது.

ஆனால், முயற்சி செய்தால் அகிம்சை கொள்கையைப்
பின்பற்ற முடியும். காந்தி ஒரு தலைவனாக இல்லாமல்
தொண்டனாக இருந்து பணியாற்றியதால்தான் உச்சத்தை
அடைய முடிந்தது.

மகாத்மா காந்தி ஒரு நாட்டின் தலைவராக இல்லாமல்
உலகத்தில் உள்ள அனைத்து நாடுகளின் குடிமகனாகவும்
திகழ்கிறார். அவரது புத்தகத்தை மொழிபெயர்த்து வெளியிடுவதும்,
அதைப் படிப்பதும் தேசத்துக்குச் செய்யும் சேவை ஆகும்.

ஹேராம் திரைப்படத்தை தயாரிக்கும்போதுதான் காந்தி குறித்து
பல அரிய தகவல்களைத் தெரிந்து கொண்டேன்.

காந்தி, தன் எளிமையான வாழ்க்கை முறையால் பலரிடம்
மாற்றத்தை ஏற்படுத்தியுள்ளார். இந்தியாவின் சின்னமாக அவர்
திகழ்கிறார். அரசியல் ரீதியாக காந்தியை அதிக அளவில்
விமர்சனம் செய்த பெரியார்கூட, காந்தி இறந்தபோது விடுதலை
நாளிதழிலில் அவரைப் பற்றி பெருமையாக தலையங்கம்
எழுதியுள்ளது அகிம்சைக்கு கிடைத்த வெற்றி ஆகும்.

எந்த அரசியல் கட்சியும் காந்தியை உரிமை கொண்டாட முடியாது.
அவரை எந்தக் கட்சியுடனும் இணைத்துப் பார்க்கக் கூடாது.
இந்தச் சமுதாயத்தின் நோயாக அரசியலும், மதமும் திகழ்கிறது
என்றார் அவர்.
–
—————————-

-
கோவையில் நடைபெற்ற நிகழ்ச்சியில் தமிழில் மொழி பெயர்க்கப்பட்ட மகாத்மா காந்தியின் “சத்திய சோதனை’ நூலை வெளியிடும் நடிகர் கமல்ஹாசன். உடன் (இடமிருந்து) சப்னா புத்தக நிலைய தலைமை செயல் அலுவலர் வி.கார்த்திகேயன், புத்தக நிலைய நிர்வாக இயக்குநர் நிதின் ஷா, பாரதிய வித்யா பவன் தலைவர் பி.கே.கிருஷ்ணராஜ் வாணவராயர், பண்ணாரி அம்மன் குழுமத் தலைவர் எஸ்.வி.பாலசுப்பிரமணியம், எழுத்தாளர் ஆண்டாள் பிரியதர்ஷினி, கவிஞர் புவியரசு.

==============