பார்லி., முற்றுகை போராட்டம்: காங்கிரஸ் அதிரடி அறிவிப்பு

புதுடில்லி :
‘மத்திய அரசை கண்டித்து, வரும், 6ல், பார்லிமென்ட்
முற்றுகை போராட்டம் நடத்தப்படும்’என, காங்கிரஸ்
அறிவித்துள்ளது.

காங்கிரஸ் செய்தி தொடர்பாளர் ரன்தீப் சுர்ஜேவாலா
கூறியதாவது:மத்தியில் மோடி அரசு பொறுப்பேற்றபின்,
ஜனநாயகம் கேள்விகுறியாகியுள்ளது. அருணாச்சல பிரதேசம்,
உத்தரகண்ட் ஆகிய மாநிலங்களில், மக்களால்
தேர்ந்தெடுக்கப்பட்ட அரசை கலைத்துவிட்டு, ஜனாதிபதி
ஆட்சியை மத்திய அரசு அமல்படுத்தியது.

அருணாச்சலில், அரசுக்கு எதிராக கொடி துாக்கியவர்களை
வைத்து, ‘பொம்மை’ அரசு அமைத்துள்ளது. உத்தரகண்டிலும்,
அப்படியொரு அரசை அமைக்க, மத்திய அரசு முயற்சித்து
வருகிறது.

காங்கிரஸ் ஆளும் மாநிலங்களில், ஆட்சியை கவிழ்க்க,
மோடி அரசு சதித் திட்டம் தீட்டி வருகிறது.

இத்தாலி நிறுவனத்திடமிருந்து ஹெலிகாப்டர் வாங்கியதில்,
ஊழல் நடந்துள்ளதாக, ஆதாரமில்லாமல் குற்றஞ்சாட்டி,
காங்கிரஸ் தலைவர்களை மத்திய அரசு தொடர்ந்து அவமானப்
படுத்தி வருகிறது.

நாட்டில் பல்வேறு மாநிலங்கள், கடும் வறட்சியில் சிக்கித்
தவித்து வருகின்றன. 40 கோடிக்கும் அதிகமான மக்கள்,
பெரிதும் பாதிக்கப்பட்டுள்ளனர்; இதுகுறித்து, மத்திய அரசு
கவலைப்படுவதாக தெரியவில்லை. மத்திய அரசின் ஜனநாயக
விரோத போக்கு, காங்கிரஸ் தலைவர்கள் மீது ஆதாரமில்லாமல்,
ஊழல் குற்றச்சாட்டுகளை சுமத்துவது, வறட்சியிலிருந்து
மக்களை காப்பாற்ற நடவடிக்கை எடுக்காதது ஆகியவற்றை
கண்டித்து, வரும், 6ல், பார்லிமென்ட் முற்றுகை போராட்டம்
நடத்த முடிவு செய்துள்ளோம்.

பல மாநிலங்களை சேர்ந்த, காங்கிரஸ் தொண்டர்கள், டில்லி,
ஜந்தர் மந்தரிலிருந்து, சோனியா, ராகுல் தலைமையில்,
பார்லிமென்டுக்கு பேரணியாக செல்லவுள்ளனர்;

அங்கு, முற்றுகை போராட்டம் நடத்துவோம்.இவ்வாறு அவர்
கூறினார்.
–
——————————
தினமலர்