விடைபெற்றது “சீ ஹாரியர்ஸ்’ போர் விமானம்

-
இந்திய கடற்படையில் “மிக்-29கே’ ரக நவீன போர்
விமானங்களை பயன்படுத்த ஏதுவாக, இதுவரை
பயன்பாட்டில் இருந்த “சீ ஹாரியர்ஸ்’ (Sea Harriers)
போர் விமானங்கள் புதன்கிழமை விடைபெற்றன.

பிரிட்டன் தயாரிப்பான சீ ஹாரியர்ஸ் போர் விமானங்கள்,
கடந்த 1983-ஆம் ஆண்டு இந்திய கடற்படையில் சேர்க்கப்
பட்டன. தற்போது, மிக்-29கே ரக நவீன போர் விமானங்களை
பயன்படுத்த இந்திய கடற்படை திட்டமிட்டுள்ளது.

இதையடுத்து, கடந்த 33 ஆண்டுகளாக பயன்பாட்டிலிருந்த
சீ ஹாரியர்ஸ் விமானங்கள் புதன்கிழமையுடன் விடை
பெற்றன.

இதையொட்டி, கோவா மாநிலத் தலைநகர் பனாஜியில்
புதன்கிழமை நடைபெற்ற நிகழ்ச்சியில், சீ ஹாரியர்ஸ்
விமானங்களைக் கொண்டு, விமானப்படை வீரர்கள் கண்கவர்
சாகசங்களை நிகழ்த்திக் காட்டினர்.

இந்நிகழ்ச்சியின் இடையே, இந்தியக் கடற்படை தலைமைத்
தளபதி ஆர்.கே. தோவன் செய்தியாளர்களிடம் கூறியதாவது:

இந்தியப் பெருங்கடல் எல்லையில் பாதுகாப்புரீதியாக எழும்
சவால்களை திறம்பட எதிர்கொள்ளும் நோக்கில், நவீன
தொழில்நுட்ப உதவியுடன் நமது கடற்படை நாளுக்கு நாள்
வலுப்படுத்தப்பட்டு வருகிறது.

-
அதன் ஒரு பகுதியாக, மிக் -29கே ரக போர் விமானங்கள்,
விமானம் தாங்கி போர்க்கப்பலான ஐஎன்எஸ்
விக்ரமாதித்யாவுடன் ஏற்கெனவே இணைக்கப்பட்டுள்ளன.

தற்போது இந்த விமானங்களை முழுவீச்சில் பயன்படுத்த
ஏதுவாக, சீ ஹாரியர்ஸ் விமானங்கள் விடைபெறுகின்றன.

விமானம் தாங்கி போர்க்கப்பலான ஐஎன்எஸ் “விராட்’டின்
பயன்பாடு படிப்படியாக குறைக்கப்படும். இதற்கு மாற்றாக,
நவீன ஐஎன்எஸ் “விக்ராந்த்’ போர்க்கப்பல், வரும் 2018-ஆம்
ஆண்டு இறுதியில் கடற்படையில் சேர்க்கப்படும் என்று
தோவன் தெரிவித்தார்.
–
—————————
தினமணி