கேரளாவில் பினராயி விஜயன் தலைமையில் புதிய அரசு 25–ந்தேதி பதவி ஏற்பு

திருவனந்தபுரம்

கேரளாவில் பினராயி விஜயன் தலைமையில் புதிய அரசு
25–ந்தேதி (புதன்கிழமை) பதவியேற்கிறது.
–
இடதுசாரி முன்னணி வெற்றி
–
கேரளாவில் சமீபத்தில் நடந்து முடிந்த சட்டசபை தேர்தலில்
மார்க்சிஸ்ட் கம்யூனிஸ்டு தலைமையிலான இடதுசாரி முன்னணி
92 இடங்களில் வெற்றி பெற்று ஆட்சியை பிடித்துள்ளது. ஆளும்
காங்கிரஸ் தலைமையிலான ஐக்கிய ஜனநாயக முன்னணி வெறும்
47 இடங்களை மட்டுமே பெற்றது.

இடதுசாரி முன்னணி வெற்றி பெற்றதால் முன்னாள் முதல்–
மந்திரியும், தற்போதைய அரசில் எதிர்க்கட்சி தலைவராக
இருந்தவருமான வி.எஸ்.அச்சுதானந்தன் முதல்–மந்திரியாவார்
என எதிர்பார்க்கப்பட்டது.

பினராயி விஜயன் தேர்வு
—
ஆனால் கட்சியின் ஆட்சிமன்றக்குழு உறுப்பினரான
பினராயி விஜயன் முதல்–மந்திரியாக தேர்வு செய்யப்பட்டார்.
நேற்றுமுன்தினம் கட்சியின் தலைமை அலுவலகத்தில் நடந்த
மாநிலக்குழு கூட்டத்தில் இடதுசாரி முன்னணியின் சட்டசபைக்
குழு தலைவராக அவர் தேர்ந்தெடுக்கப்பட்டார்.

இதைத்தொடர்ந்து கேரளாவின் புதிய முதல்–மந்திரியாக அவர்
25–ந்தேதி (புதன்கிழமை) பதவியேற்கிறார். அன்று மாலையில்
திருவனந்தபுரம் மத்திய மைதானத்தில் நடைபெறும் விழாவில்
புதிய அரசு பதவியேற்பதாக பினராயி விஜயன் நேற்று
செய்தியாளர்களிடம் கூறினார்.

மேலும் புதிய அமைச்சரவை மற்றும் அமைச்சர்கள் குறித்து
இடதுசாரி முன்னணி தலைவர்கள் இன்று (ஞாயிற்றுக்கிழமை)
கூடி இறுதி செய்வார்கள் எனவும் அவர் தெரிவித்தார்.

அச்சுதானந்தனுடன் சந்திப்பு
–
இதற்கிடையே கேரள இடதுசாரி முன்னணியின் மூத்த
தலைவரான அச்சுதானந்தனை திருவனந்தபுரத்தில் உள்ள
அவரது இல்லத்தில் பினராயி விஜயன் நேற்று சந்தித்து,
புதிய அரசு பதவியேற்பு விழாவுக்கு வருமாறு அழைப்பு
விடுத்தார். அவருடன் மாநில மார்க்சிஸ்ட் கம்யூனிஸ்டு
செயலாளர் கொடியேறி பாலகிருஷ்ணனும் சென்றார்.

இந்த சந்திப்பின் போது கேரளாவில் அத்தியாவசிய
பொருட்களின் விலையை குறைப்பதற்கும், மாநிலத்தில்
பெண்களின் பாதுகாப்பை உறுதி செய்யவும் உடனடி
நடவடிக்கை மேற்கொள்ளுமாறு பினராயியை
அச்சுதானந்தன் கேட்டுக்கொண்டதாக தெரிகிறது.

உம்மன்சாண்டிக்கு அழைப்பு

அச்சுதானந்தனை சந்தித்து விட்டு மகிழ்ச்சியுடன் வெளியே
வந்த பினராயி விஜயன், ‘இடதுசாரிகள் சார்பில்
முதல்–மந்திரி பதவியை அலங்கரித்த கடைசி தலைவர்
அச்சுதானந்தன். மிகுந்த அனுபவம் வாய்ந்த அவரிடம் இருந்து
பல்வேறு விஷயங்களை கற்றுக்கொள்வது முக்கியமானது’
என்று கூறினார்.

புதிய அரசு பதவியேற்பு விழாவுக்கு உம்மன்சாண்டிக்கும்,
பினராயி விஜயன் அழைப்பு விடுத்துள்ளார். இது தொடர்பாக
அனைவரையும் பினராயி விஜயன் சந்தித்து பேசினார்.
–
————————–
தினத்தந்தி