தென்மேற்குப் பருவமழை நாளை தொடக்கம்: தமிழகத்தில் மழைக்கு வாய்ப்பு

தென்மேற்கு பருவமழை கேரளத்தில் வியாழக்கிழமை தொடங்கும்
என்று எதிர்பார்க்கப்படுகிறது. இதன் காரணமாகவும், வெப்பச்
சலனத்தின் காரணமாகவும் தமிழகத்தில் மழை பெய்ய வாய்ப்புள்ளது
என்று வானிலை ஆய்வு மையம் தெரிவித்துள்ளது.
-
அடுத்த 36 மணி நேரத்தில் தென் தமிழகத்தின் ஒரு சில இடங்களிலும்,
வடதமிழகத்தில் ஒன்று அல்லது இரண்டு இடங்களில் மழை பெய்ய
வாய்ப்பு உள்ளது என்றும் சென்னையில் இடியுடன் கூடிய மழை பெய்ய
வாய்ப்பு உள்ளது என்றும் இந்திய வானிலை ஆய்வு மையம் தெரிவித்துள்ளது.
-
மழை நிலவரம்:
தமிழகத்தில் அதிகபட்சமாக திருவள்ளூர் மாவட்டம் செம்பரம்பாக்கத்தில்
50 மி.மீ. மழை பதிவாகியுள்ளது. அடுத்தபடியாக சென்னை, திருவள்ளூர்
மாவட்டம் ஆர்.கே.பேட்டை, ஸ்ரீபெரும்புதூர், கன்னியாகுமரி மாவட்டம் தக்கலை
ஆகிய இடங்களில் 40 மி.மீ. மழை பதிவாகியது. இதுதொடர்பாக வானிலை
ஆய்வு மைய அதிகாரிகள் கூறியது:
-
கேரள மாநிலத்தில் ஜூன் 9 முதல் தென்மேற்குப் பருவமழை தொடங்கும்
என்று எதிர்பார்க்கப்படுகிறது. இதனால், மேற்கு தொடர்ச்சி மலைப் பகுதிகளான
கன்னியாகுமரி, தேனி, நீலகிரி, கோவை உள்ளிட்ட பகுதிகளில் கன மழை
பெய்யக்கூடும்.
-
சென்னை, திருவள்ளூர், காஞ்சிபுரம் உள்ளிட்ட வட மாவட்டங்களில் வெப்பச்
சலனத்தின் காரணமாக மாலை அல்லது இரவு நேரங்களில் இடியுடன் கூடிய
மழை பெய்யக்கூடும் என்றனர்.
-
-------------------------