வெளிநாடுகளில் இருந்து 5 ஆயிரம் டன்கள் பருப்பு இறக்குமதி

by rammalar Mon Jun 13, 2016 7:36 pm

-
நாட்டில் பருப்பு வகைகளின் விலை உயர்வைக் கட்டுப்படுத்தும் வகையில், வெளிநாடுகளில் இருந்து 5 ஆயிரம் டன்கள் பருப்பு வகைகளை இறக்குமதி செய்வதற்கு மத்திய அரசு முடிவு செய்துள்ளது. இதற்கான டெண்டரை அரசு பொதுத்துறை வர்த்தக நிறுவனமான எம்.எம்.டி.சி அறிவித்துள்ளது.
-
கடந்த 2 ஆண்டுகளாக நிலவி வரும் வறட்சி காரணமாக பருப்பு வகைகளின் உற்பத்தி 2 மில்லியன் டன் அளவுக்கு குறைந்தது. இதையடுத்து, நாடு முழுவதும் பருப்பு வகைகளின் விலை முன்னெப்போதும் இல்லாத அளவுக்கு பலமடங்கு உயர்ந்தது.
-
இதையடுத்து, வெளிநாடுகளில் இருந்து மத்திய அரசால் 5,000 டன் பருப்பு வகைகள் இறக்குமதி செய்யப்பட்டு மாநிலங்கள் மூலம் சந்தையில் விநியோகிக்கப்பட்டன. இருப்பினும், சந்தையில் பருப்பு வகைகளின் விலை குறையவில்லை. தொடர்ந்து அதிக விலைக்கே விற்பனை செய்யப்படுகின்றன.
-
இந்நிலையில், தற்போது 17 மில்லியன் டன்கள் பருப்புகள் உற்பத்தியாகியுள்ள நிலையில், தேவை 23.6 மில்லியன் டன்களாக உள்ளது. தேவை அதிகமாக இருப்பதால் ஏற்கனவே கடந்த 2015-16 நிதியாண்டில் 5.5 மில்லியன் டன்கள் பருப்பு வகைகள் இறக்குமதி செய்யப்பட்டிருந்தன. இருப்பினும், 1 மில்லியன் டன் அளவிற்கு இப்போதும் தட்டுப்பாடு நிலவி வருகிறது. இதுவே விலை உயர்வுக்கு காரணமாக இருப்பதாகவும் கூறப்படுகிறது.
-
இதையடுத்து, இதற்கு தீர்வு காணும் வகையில், எம்.எம்.டி.சி வாயிலாக கனடா மற்றும் ஆஸ்திரேலியாவில் இருந்து 5 ஆயிரம் டன்கள் பருப்பு வகைகளை இறக்குமதி செய்ய டெண்டர் அறிவிக்கப்பட்டுள்ளது.
-
தினமணி