ஓரிடம் வேண்டும்...!

-
தண்டவாளமாக இருந்து விட்டுப் போகிறேன்
நீ என்மீது பயணம் போகும்
தொடர் வண்டியாக இருந்தால்
-
தொட்டித்தண்ணீராக இருந்து விட்டுப் போகிறேன்
நீ என்னைக் கோப்பையில் அள்ளி
உன் மேனியை அலசுவதாக இருந்தால்
-
கண்ணாடியாக இருந்து விட்டுப்போகிறேன்
நீ என்மீது அடிக்கடி
உன் நெற்றிப்பொட்டை ஒட்டுவதாக இருந்தால்
-
புத்தகத்தின் அட்டையாக இருந்துவிட்டுப் போகிறேன்
நீ உன் மார்போடு சேர்த்து
என்னை அணைத்துக்கொள்வதாக இருந்தால்
-
உன் வீட்டுத் தொலைபேசியாக இருந்துவிட்டுப் போகிறேன்
நீ என்னைக் காதோடும் இதழோடும்
சேர்த்து வைத்து இரகசியம் பேசுவதாக இருந்தால்
-
கயிற்றுக்கொடியாக இருந்துவிட்டுப் போகிறேன்
நீ உன் ஆடைகளனைத்தையும்
என்மீது தொங்க விடுவதாக இருந்தால்
-
எனக்குத் தேவையெல்லாம் ஓரிடம்!
உனக்குள்ளே உன்னைச் சுற்றியோ ஓரிடம்!
-
மனதில் காதலனாக இல்லாவிடாலும் உன்
மனதில் கவலைகளைச் சுமக்கும்
குப்பைத்தொட்டியாக இருந்துவிட்டுப் போகிறேன்
-
எனக்குத் தேவையெல்லாம் ஓரிடம்!
உனக்குள்ளே உன்னைச் சுற்றியோ ஓரிடம்!
-
-----------------------------
-க.ராஜ்குமார்
விழியோரக் கண்ணீரும் இதழோர புன்னகையும்-
கவிதை தொகுப்பிலிருந்து
-